08 февраля 2017 г.
Йĕлтĕр йĕрĕ çине
Февралĕн 11-мĕшĕнче пирĕн районта, В. Егорова ячĕллĕ спорт шкулĕ патĕнче, "Раççей йĕлтĕр йĕрĕ -2017" массăллă чупу иртет.
Тунтикун йĕркелÿ комитечĕ çак чупăвăн дистанцийĕсене тата хутшăнакансен ÿсĕмĕсене палăртрĕ. Паллах, кăмăла хăпартма йĕлтĕрпе пурте ярăнма пултараççĕ. Ăмăртăва хутшăнма вара çак ÿсĕмсене палăртнă: шкулчченхи ачасем (400 м), 2007 çулта çуралнă тата кĕçĕнрех шкул ачисем (1 км), 2005-2006 çулсенче çуралнисем (1 км), 2003-2004 çулсенче çуралнисем (3 км), 2001-2002 çулсенче çуралнисем (3 км), 1999-2000 çулсенче çуралнисем (яшсем 5 км, хĕрсем 3 км), 1998 çулта çуралнисем тата аслăраххисем (3 км). Ертÿçĕсен дистанцийĕ 1 км тăршшĕ. Ветерансем старта 3 ÿсĕмре тухаççĕ: 40-рен, 50-ран тата 60-тан иртнисем. Вĕсен те йĕлтĕр йĕрĕ 1 км.
Ăмăртăва хутшăнакансен пурин те врач алă пусса çирĕплетнĕ справка пулмалла.
Спорт уявĕ 11 сехетре пуçланать.
Ветеран патĕнче
Паян пирĕн районта Тăван çĕршывăн Аслă вăрçин 27 ветеранĕ пурăнать. Вĕсем - районăн мухтавĕ. Ветерансенчен иккĕшĕ - Г. Илугинпа А. Капитонов - Сталинград патĕнчи çапăçуран чĕрĕ тухса çĕнтерĕве кĕтсе илнисем.
Çак тунтикун Юнкăри вăтам шкулта вĕренекенсем Григорий Илугин ветеран патне çитсе килнĕ. Г. Илугин, çулĕсене пăхмасăрах, халĕ те активлă пурнăçпа пурăнать, ял тăрăхĕнче ачасемпе çамрăксене патриот воспитанине парассине пысăк тÿпе хывать. Вăл 5 ача ашшĕ кăна мар, 21 кĕçĕн мăнукĕпе те мухтанма пултарать.
Ветеран ачасене Сталинград патĕнчи çапăçусем пирки, Аслă Çĕнтерÿ кунне мĕнле кĕтсе илни çинчен каласа панă. Ачасем вара ветерана мирлĕ пурнăçшăн тав туса пĕчĕк концертпа савăнтарнă.
Патриотсем ÿсеççĕ
Январь уйăхĕнче районти çамрăк армеецсен слечĕпе пуçланнă оборонăпа массăллă ĕç тата спорт уйăхлăхĕ малалла пырать.
Вĕренÿ пайĕ çирĕплетнĕ ĕçсен планĕ пысăк та анлă. Кашни кун тĕрлĕ мероприяти иртет. Февралĕн 1-мĕшĕнче призывчченхи çамрăксем хушшинче тĕл перекенсен ăмăртăвĕ пулчĕ, кашни шкултах хĕллехи "Зарница" тата "Орленок" вăййисем пыраççĕ, шкулсенче аслă ăрусемпе тĕл пулусем иртеççĕ. Орининти вăтам шкулта "Эпĕ - пулас хÿтĕлевçĕ" конкурс та интереслĕ пулнă.
Мероприятисем малалла пыраççĕ.
Н. Николаева хатĕрленĕ.