08 февраля 2017 г.
Муркаш районне туса хунăранпа февралĕн 10-мĕшĕнче 73 çул çитет. Çак куна халалланă уява Шупашкарта ирттересси - ырă йăлара: район ĕçĕ-хĕлĕпе районта пурăнаканасем кăна мар, ыттисем те паллашма пултараççĕ.
Кăçалхи уяв февралĕн 10-мĕшĕнче К. Иванов ячĕпе хисепленекен Чăваш патшалăх академи драма театрĕнче иртет.
Уявра муркашсем савăнăçлă лару-тăрура Раççейри Экологи çулталăкне тата Чăваш Енри Амăшĕпе Ашшĕн çулталăкне те уçаççĕ.
Уява ирттерессипе ĕçлекен йĕркелÿ комитечĕ тунтикун черетлĕ канашлăва пухăнса ку таранччен пурнăçланă тата çитес кунсенче туса çитермелли ĕçсене тишкерчĕ.
Театр вешалкăран пуçланать теççĕ те, район уявĕ та кунти фойерех пуçланать. Хăнасене вырăнти фольклор ушкăнĕ юрă-ташăпа кĕтсе илĕ.
Фойере йĕркеленĕ куравра пирĕн районти предприяти-организацисемпе паллашма май пулĕ. Каска кăмпи çитĕнтерекен "Агрико" пĕрлешÿ* районта кăна мар, çĕршывĕпех паллă "ТрубпластÇ" пĕрлешÿ* Муркаш чăх-чĕп фабрики* "Карина" пĕрлешÿ* "Дуэт" сĕтел-пукан лавкки тата ыттисем хăйсем туса кăларакан продукципе паллаштарĕç.
Курава Тури чăвашсен музейĕн экспоначĕсем, Ача-пăча пултарулăх çуртĕнче хушма пĕлÿ илекен ачасен ал ĕçĕсем пуянлатĕç.
Мăн Сĕнтĕр тата Муркаш райповĕсем туса кăларакан тутлă апат-çимĕçе те тутанса пăхма май пулĕ.
Муркаш районĕн 2016 çулхи ĕç-хĕлне сăнлакан видеофильма хатĕрлесе пĕтернĕ. Ăна мероприятие уçиччен маларах кăтартаççĕ.
Уява районти пур ял тăрăхĕн, пур предприяти тата учрежденипе организаци представителĕсем те хутшăнаççĕ. Муркашсене саламлама республикăри ертÿçĕсем те, кÿршĕсем те, Шупашкарти ентешлĕхĕн пайташĕсем те, ыттисем те кăмăл тунă.
Сцена çине вара çав кун вĕсемпе пĕрлех районти тĕрлĕ отрасльте ĕçлесе палăрнисем, ЧР Пуçлăхĕн стипендине тивĕçнĕ хастар çамрăксем, районти предприяти-организацисем хушшинче иртнĕ экономика ăмăртăвĕнче тата ытти конкурсра мала тухнисем те хăпарĕç. Пурне те тивĕçлĕ награда кĕтет.
Уява хутшăнакансен муркашсен илемлĕ юрри-ташшине пăхса савăнма май пулĕ.
Уяв 11.00 сехетре пуçланать.
Район тата республика çинчен каласа кăтартакан кĕске видеофильмсене унччен кăтартнине тата фойери куравсемпе паллашма вăхăт кирлине шута илсен, театра сахалтан та пĕр сехет маларах çитме тăрăшмалла.
Н. Николаева.