18 февраля 2017 г.
Районта кашни канмалли кун тĕрлĕ спорт ăмăртăвĕ иртет. Иртнĕ шăматкун акă "Йĕлтĕр йĕрĕ - 2017" массăллă чупу иртнипе пĕрлех Чуманкасси ял тăрăхĕнче Чапаев парнисене çĕнсе илессишĕн спорт ăмăртăвĕ иртрĕ.
Çак ăмăртăва иртнĕ ĕмĕртех ирттерме тытăннă. Яланах В. И. Чапаев çуралнă кунĕ тĕлĕнче ирттернĕ.
Ял тăрăхĕн депутачĕ - спортпа туслă Николай Данилов кун пирки çапла аса илет:
- Эп астăвасса çак ăмăрту 1977 çулта пĕрремĕш хут иртрĕ. Эпĕ ун чухне 9-мĕш класра вĕренетĕп (хальхипе 10-мĕшĕнче). Мана колхоз командишĕн волейболла выляма ыйтрĕç те, килĕшрĕм. Ăмăртăва йĕркелессипе ун чухне Георгий Захаров, Юрий Захаров, Валерий Семенов тата ыттисем тăрăшнă. Унтанпа 40 çул иртрĕ. Хăш-пĕр çулсенче ăмăртăва ирттерменни те пулнă, анчах юлашки çулсенче ăмăртăва тăтăшах Чуманкасси шкулĕнче ирттереççĕ.
Апла Чапаев ячĕпе хисепленекен хуçалăхра пуçарса янă ăмăртăвăн историйĕ чăн та вăрăм. Хальхи вăхăтра ăна ирттерессипе вырăнти ял тăрăхĕн тата шкулăн администрацийĕсем тачă çыхăнса ĕçлеççĕ. Кунсăр пуçне ял тăрăхĕнчи çамрăксен канашне ертсе пыракан Максим Сергеева та ырăпа палăртмалла - çамрăксене пĕрле пухса спорт ăмăртăвĕсене явăçтарма тăрăшать.
Ку хутĕнче те районти 9 команда спортăн тĕрлĕ тĕсĕнче вăй виçрĕ: волейболла вылярĕç, сĕтел çи теннисла, пăшалтан тĕл перессинче ăмăртрĕç, кире пуканĕ çĕклерĕç, шашкăлла вылярĕç. Пĕтĕмĕшле кăтартусемпе Оринин команди мала тухрĕ, 2-мĕш тата 3-мĕш вырăнсенче - "Ударник" тата Отарккă ялĕн команди.
Ку ăмăртуччен маларах вара Йÿçкассинче шашкăлла вылякансен черетлĕ 10-мĕш турнирĕ иртрĕ. Ăна шашкăлла выляссипе СССР спорт мастерĕн кандидачĕ, икĕ хутчен республика чемпионĕ ята çĕнсе илнĕ А. Ермолаев пуçарăвĕпе йĕркеленĕ.
Кăçалхи турнира муркашсем кăна мар, Красноармейски районĕнчи шашистсем те килсе çитнĕ.
Вăйăсенче пухнă очкосемпе килĕшÿллĕн 1-мĕш вырăна А. Прокопьев, 2-мĕш вырăна В. Егоров, 3-мĕш вырăна В. Никитин тухнă.
Н. Николаева.