18 февраля 2017 г.
Ветеран салтаксене
халалланă
Февралĕн 15-мĕшĕнче, воин-интернационалистсене асăнмалли кун, тури чăвашсен музейĕнче "За хребтом Гиндукуш обняла нас война" республика выставки уçăлнă. Ку вăл - Афган вăрçин ветеранĕсен тата Чăваш наци музейĕн пĕрлехи проекчĕ.
Афган вăрçин вут-çулăмĕ витĕр Чăваш Енри 4,5 пин ытла çамрăкăн тухма тивнĕ. 113 яш вăрçăра пуçне хунă. Вăл шутран пирĕн район çичĕ салтака çухатнă.
Выставкăна уçнă çĕре Муркаш шкулĕнче 4 а класра вĕренекенсем хутшăннă. Выставка март уйăхĕ вĕçленичченех пырать. Экспонатсемпе паллашма кашнинех интереслĕ пулĕ.
Муркашра - Çветуй
Матрона хăвачĕ
Муркаш чиркĕвне Мускаври Çветуй Блаженнăй Матрона хăвачĕн пайне илсе килнĕ. Хăват пайĕ февралĕн 26-мĕшĕччен пулать. Çак кунсенче чиркÿ 18 сехетчен уçă пулать. Кашни кунах акафистпа кĕлĕ ирттереççĕ. Кĕлĕ 17 сехет те 15 минутра пуçланать. Муркаш чиркĕвĕнче кашниех Мускаври Çветуй Блаженнăй Матрона хăвачĕн пайне пуç çапма пултарать.
Инкек-синкекрен
асăрханар
Юлашки вăхăтра çил-тăманлă кунсем пулкаларĕç, чылай çĕрте çуртсен çийĕсене юр хÿсе тултарнă. Анчах та çакă иртен-çÿрен çынсемшĕн хăрушлăх кăларса тăратма пултарать. Çанталăк ăшăтса пынă май юр пусăрăнса пирчекленет, çурт çийĕсем çинчен анса ÿкме пултарать. Çавăнпа та район администрацийĕн ятарлă программăсен пайĕнчен çапла пĕлтереççĕ: предприятисемпе организацисен ертÿçисен çуртсен çийĕсене юртан тата шăнса ларнă пăртан тасатассине йĕркелес пулать. Çуран çÿрекенсен те асăрхануллăрах пулни пăсмĕ.
195 ваканси пур
Кăçал çулталăк пуçланнăранпа районти ĕçпе тивĕçтерекен центрта 133 çынна йышăннă. Ĕçсĕррисем тесе регистрациленисем февралĕн 1-мĕшĕ тĕлне - 72 çын. Ку вăл ĕçлеме пултаракан çынсен 0,39 проценчĕпе танлашать. Ĕç паракансем пĕлтернĕ тăрăх, 195 ваканси пур. Çулталăк пуçланнăранпа 45 çынна яланлăх ĕç вырăнĕ тупса панă. 6 çынна обществăлла ĕçсене явăçтарнă, çул çитмен 20 çамрăка вăхăтлăх ĕç тупса панă, 7 çынна професси пĕлĕвне, квалификацие ÿстерме янă.
В. ШАПОШНИКОВ
хатĕрленĕ.