18 февраля 2017 г.
Совет çарĕсене Афганистанран кăларнине асăнса, интернационалист-салтаксене халалласа Муркаш район администрацийĕн пуçлăхĕн кубокне çĕнсе илессишĕн февралĕн 16-18-мĕшĕсенче Муркашри "Сывлăх" спорт шкулĕнче уçă бокс турнирĕ иртет.
Муркаша 100 ытла спортсмен килсе çитрĕ: Чулхула, Кстово, Дзержинск, Ульяновск, Звенигово, Козьмодемьянск, Йошкар-Ола, Шупашкар, Çĕнĕ Шупашкар, Канаш, Çĕрпÿ, Улатăр хулисенчен тата Чăваш Енри районсенчен. Паллах, чи йышлă команда - муркашсен. "Сывлăх" спорт шкулĕн аслă тренерĕ Сергей Черкашин каланă тăрăх, командăра 30 ытла боксер. Судьясен "географине" тишкерсен те ăмăртăвăн сумĕ пысăкки курăнать - Казахстанран килнине те каларĕç.
Муркашри бокс шкулне кунта куçса килнĕ Сергей Черкашин 1995 çулта пуçарса янă. Унтанпа вара 3 Раççей спорт мастерне ÿстернĕ: Сергей Черкашин (ывăлĕ), Александр Никитин тата Андрей Тимофеев. Ку тапхăрта бокс енĕпе спорт мастерĕн 16 кандидатне хатĕрленĕ.
Çак чăнах та тивĕçлĕ ĕçе пысăк хак парса район администрацийĕн пуçлăхĕ Ростислав Тимофеев турнира пухăннисене саламласа боксерсене ăнăçу сунчĕ.
Чăваш Ен спорт министрĕн çумĕ Игорь Головин самантпа усă курса пирĕн районти тепĕр боксера - Иван Налимова спорт мастерĕн кандидачĕн нормативне пурнăçланă ятпа саламларĕ, çакна çирĕплетекен паллă тата удостоверени парса чысларĕ.
Кĕрешÿсем умĕн çамрăксене ырă сунса вĕрентсе каланă тата салам сăмахĕсем нумай пулчĕç: Муркаш тата Элĕк районĕсен çар комиссарĕ В. Казаков, Афганистанра хăйсен салтак тивĕçне пурнăçланă ветеран-салтаксем тата ыттисем те.
Мăн Сĕнтĕрти вокалпа инструментсен "Картина" ушкăнĕ вара турнирта хуçаланакан патриот туйăмне татах вăйлатма пулăшрĕ.
Пирĕн районти тренерсем те (сăн ÿкерчĕкре сулахайран сылтăмалла: Михаил Николаев, Сергей Черкашин тата Олег Сютруков) хăйсен воспитанникĕсене ответлă кĕрешÿсем умĕн кирлĕ сĕнÿсем пачĕç.
Муркаш боксерĕсем малтанхи кĕрешÿсенчех ырă шанăç çуратрĕç. Район командин пĕтĕмĕшле кăтартăвĕ вара паян паллă пулĕ.
Н. Николаева сăн ÿкерчĕкĕ.