04 февраля 2017 г.
Ĕнер Муркаш районĕнче пирĕн ентеш - Раççей Федерацийĕн Патшалăх Думин депутачĕ Леонид Черкесов пулчĕ, Катькас ял тăрăхĕнчи Шомик клубне тата Ильинка ял тăрăхĕнчи Ильинка шкулне çитсе курчĕ, ял çыннисемпе, шкул коллективĕпе курса калаçрĕ. Тĕл пулусене район администрацийĕн пуçлăхĕ Ростислав Тимофеев, райадминистрацин культура, архив ĕçĕсен тата туризм пайĕн пуçлăхĕ Елена Чернова, вĕренÿ, çамрăксен политикин тата физкультурăпа спорт пайĕн пуçлăхĕ Зоя Дипломатова хутшăнчĕç.
Патшалăх Думин депутачĕ района çитсе курни ăнсăртран мар. "Единая Россия" парти пуçарнипе иртнĕ çулсенче те, хальхи вăхăтра та çĕршывра пысăк пĕлтерĕшлĕ проектсем пурнăçа кĕреççĕ. Вĕсенчен чылайăшĕ ял пурнăçне лайăхлатса пырассипе, вĕренÿ тата культура сферисене, сывлăх сыхлавне малалла аталантарассипе, физкультурăпа тата спортпа туслашакансен йышне ÿстерессипе çыхăннă.
Ку проектсен шайĕнче пирĕн районта та юлашки вăхăтра калăпăшлă ĕçсем туса ирттерме май килнĕ. Палăртнă ĕçсем вара татах пур. Шомик клубĕнче тата Ильинка шкулĕнче пулса курни те шăпах çакăнпа çыхăннă.
Акă паян Шомикра 550 çын пурăнать. Кунти клуб çурчĕ вара 1974 çулта туса лартнăскер. Унтанпа кунта вак-тĕвек юсав ĕçĕсем кăна туса ирттернĕ. Иртнĕ çул электрооборудование улăштарма май килнĕ. Район администрацийĕн пуçлăхĕ Ростислав Тимофеев каласа панă тăрăх вара кунта йĕркеллĕ Культура çурчĕ кирлех. Çынсен йышĕ хушăнса пырать. Вырăнĕ малашлăхлă. Çывăх вăхăтрах спортзал тăвасси пирки те шухăшлас пулать.
"Единая Россия" парти фракцийĕн "Вырăнти Культура çурчĕ" проектне пурнăçа кĕртнĕ май кăçал клуб çуртне тĕпрен юсама палăртнă. Туса ирттермелли ĕçсем шутĕнче çурта çĕнĕрен витесси, чÿрече блокĕсене улăштарасси, ытти ĕçсене туса ирттересси. Малтан шутласа пăхнă тăрăх, 1 млн та 600 пин тенкĕне яхăн кирлĕ пулать. 650 пин тенкĕне яхăн федераци бюджетĕнчен, 50 пин тенкĕ ытла республика бюджетĕнчен уйăрма палăртнă. Вырăнти бюджетран 880 пин тенкĕ ытла уйăрмалла пулать.
Леонид Черкесов Ильинкăри вăтам шкулта пулса курнипе кăмăллă юлчĕ. Шкул учителĕн пархатарлă ĕçĕ уншăн яланах çывăх пулни, хăйĕн амăшĕ те чылай çул шкулта вăй хуни пирки каларĕ.
Паянхи куна шкулти спортзалра капиталлă юсав ĕçĕсем туса ирттермелле, чÿрече блокĕсене тата кабинетсемпе коридорта урай улăштармалла. Вырăнти бюджетран, республикăран тата федераци шайĕнчен укçа-тенкĕ уйăрнипе кунта та калăпăшлă юсав ĕçĕсем туса ирттерме палăртаççĕ.
Ял çыннисемпе, шкул коллективĕпе тĕл пулнă май Леонид Черкесов çынсен ыйтăвĕсене тулли хуравсем пачĕ, Патшалăх Думин, "Единая Россия" партин Думăри фракцийĕн ĕçĕ-хĕлĕ пирки каласа кăтартрĕ. Хальхи вăхăтра федераци, республика шайĕнче калăпăшлă ĕçсем туса ирттерме пысăк проектсем пурнăçа кĕреççĕ. Вĕсене активлă хутшăнма чĕнсе каларĕ.
В. ШАПОШНИКОВ.
Сăн ÿкерчĕкре: тĕл пулусенче РФ Патшалăх Думин депутачĕ патне ыйтусем сахал мар пулчĕç.