04 февраля 2017 г.
"Раççей йĕлтĕр йĕрĕ - 2017
Февралĕн 11-мĕшĕнче пирĕн районта, çĕршыври чылай регионти пекех, "Раççей йĕлтĕр йĕрĕ" массăллă чупу иртет.
Каласа хăвармалла, çак чупу пĕрремĕш хут Раççейре 1982 çулта иртнĕ. Унтанпа спорт уявне хутшăнакан йĕлтĕрçĕсен йышĕ пысăклансах пырать. Кăçалхи стартсене, малтанласа палăртнă тăрăх, пурĕ 74 регионти пин-пин çын хутшăнма кăмăл тунă.
Муркашра йĕлтĕр йĕрĕ яланхи вырăнтах пулĕ - В. Егорова ячĕллĕ спорт шкулĕн Муркашри филиалĕ патĕнче. Халĕ районта дистанцисене палăртса йĕлтĕр йĕрне хатĕрлес ĕç пырать.
Ăмăрту условийĕсемпе хаçатăн çитес номерĕнче тĕплĕнрех паллаштарăпăр.
Патшалăх пулăшать
Январĕн 1-мĕшĕнче Раççей Пенси фончĕн Чăваш Республикинчи управленийĕ ветерансен, инвалидсен тата социаллă хÿтлĕхри ытти çынсен общество организацийĕсен ертÿçисемпе видеоконференци мелĕпе çавра сĕтел ирттернĕ. Ăна управлени ертÿçи Роза Кондратьева ертсе пынă. Çавра сĕтеле Пенси фончĕн районти пай ертÿçи Ирина Гришина, районти социллă пулăшупа тивĕçтерекен центр директорĕ Ольга Иванова, агропромышленноç комплексĕнче ĕçленĕ ветерансен районти канашĕн председателĕ Валерий Вязов, пенсионерсен районти канашĕн председателĕ Алексей Скворцов тата ыттисем хутшăннă. Канашлура аслă ăру çыннисене 2017 çулта патшалăх пулăшăвĕпе тивĕçтерессин майĕсем пирки калаçу пынă.
Конкурс пуçланчĕ
Ытти çулсенчи пекех, кăçал та районта художество пултарулăх коллективĕсен "Чечеклен, юратнă Муркаш ен!" фестиваль-конкурсĕ иртет. Коллективсем куракансене хăйсен пултарулăхĕпе савăнтарма тытăнчĕç ĕнтĕ. Конкурс мартăн 15-мĕшĕччен пырать. Февралĕн 1 - 2-мĕшĕсенче Хорнуй ял тăрăхĕнчи "Хĕлхем" эстрада халăх ансамблĕ, Муркаш ял тăрăхĕнчи "Муркаш" фольклор халăх ансамблĕ, эстрада юррисен "Расна" халăх ансамблĕ тата ветерансен халăх хорĕ хăйсен концерт программисемпе паллаштарнă.
В. ШАПОШНИКОВ
хатĕрленĕ.