21 января 2017 г.
Çулталăк вĕçленнĕ май ырă йăлапа коллективсенче иртнĕ çул итогĕсене пĕтĕмлетесси, малашлăх задачисене палăртасси йăлана кĕнĕ. Юлашки çулсенче кун пек отчетлă тĕл пулусене ял тăрăхĕсенче те йĕркелесе ирттерме тытăнчĕç. Кăçал та ял тăрăхĕсен пуçлăхĕсем вырăнти ял çыннисем умĕнче отчетсем тăвĕç-и; Ку ыйту çине эпĕ район администрацийĕн пуçлăхĕн çумне - йĕркелÿпе кадрсен, право енĕпе тивĕçтерессин тата вырăнти хăй тытăмлăх органĕсемпе ĕçлекен пайĕн пуçлăхне Лилия ТАРАСОВĂНА хуравлама ыйтрăм:
- Çапла, кун пек мероприятисене январĕн 23-мĕшĕнченех ирттерме тытăнма палăртатпăр. Январь уйăхĕн вĕçĕнчен тытăнса отчетлă тĕл пулу мероприятийĕсене февраль уйăхĕн пуçламăшĕччен пур ял тăрăхĕнче те ирттерсе пĕтерме шухăшлатпăр.
Ял çыннисемпе ирттерекен тĕл пулусенче тĕп ыйту, паллă ĕнтĕ, вырăнти пуçлăхăн отчетне сÿтсе явасси пулĕ. Пуçлăхсем отчетлă тапхăрта хăйсем, ял тăрăхĕн администрацийĕ туса ирттернĕ ĕçсем пирки каласа парĕç, ял çыннисене канăç паман ыйтусене хуравлĕç, малашлăх тĕллевĕсене уçăмлатĕç, умри кая хăвармасăр татса памалли проблемăсене тишкерĕç.
Тĕл пулусене ял çыннисем, вырăнти актив, вырăнти депутатсем активлă хутшăнасса шанас килет. Мĕншĕн тесен вырăнти пĕлтерĕшлĕ ыйтусене ăнăçлă татса парасси кашнинчен тата пуринчен килет. Пĕрлехи ыйтусем пурне те хумхантарма тивĕç.
Ку тĕл пулусене район администрацийĕн яваплă ĕçченĕсем те хутшăнĕç. Вĕсем ял çыннисене районăн иртнĕ çулхи экономика тата социаллă пурнăç аталанăвĕн итогĕсем пирки каласа парĕç, умри задачăсемпе паллаштарĕç.
В. ШАПОШНИКОВ.