21 января 2017 г.
Çĕнĕ директор
Кăрлач уйăхĕн 17-мĕшĕнче Орининти пĕтĕмĕшле пĕлÿ паракан вăтам шкул директорне çирĕплетессипе конкурс иртнĕ. Унта икĕ вĕрентекен хутшăннă. Пĕри - Орининти вăтам шкул директорĕн заместителĕ Ирина Григорьева. Тепри - Атапайĕнчи пĕтĕмĕшле пĕлÿ паракан тĕп шкулта историпе физкультура вĕрентекен Николай Щукин.
Конкурс пуçланиччен комисси (ăна район администрацийĕн пуçлăхĕ Ростислав Тимофеев ертсе пынă) членĕсем кандидатсене çирĕп тĕрĕсленĕ. Вĕсем, тĕпрен илсен, пулас директор шкул аталанăвне мĕнре курнипе, кандидатсен ĕç пахалăхĕпе тата опычĕпе, вĕсем конкурса тăратнă программăсемпе интересленнĕ.
Пĕтĕмлетÿре çамрăкрах кандидат ытларах шанчăк пани палăрнă. Çапла вара Орининти шкул директорĕ пулма Н. Щукина çирĕплетнĕ.
Купăста туса илессипе
Çĕнĕ çул пуçланчĕ кăна-ха, анчах çĕр ĕçченĕ çитес çур аки пирки те шутлама пуçларĕ. Иртнĕ тунтикун, кăрлач уйăхĕн 17-мĕшĕнче, Куславкка районĕнчи В. Семенов хресчен (фермер) хуçалăхĕнче купăста тата ытти пахча çимĕç туса илессипе республика шайĕнче ирттернĕ семинар-канашлу та çавнах çирĕплетет. Асăннă фермер уçă ана çинче пахча çимĕç туса илессипе пысăк опыт пухнă.
Асăннă семинар-канашлăва пирĕн тăрăхран Чăваш Республикинчи "Россельхозцентр" филиалăн районти пайĕн пуçлăхĕ А. Павлов, КМК "Агро" ертÿçи В. Кондратьев, район администрацийĕн экономикăпа АПК аталанăвĕ пайăн специалисчĕ А. Ершов хутшăнчĕç.
Купăста лартасси юлашки çулсенче районта вăй илсех пырать. 2013 çулта районти пĕрлешÿллĕ хуçалăхсем ку пахча çимĕçе 29,2 гектар лартнă пулсан, иртнĕ çул унăн лаптăкĕ 75,8 гектара çитрĕ. Пĕлтĕр 30 гектар купăста лартса ÿстернĕ КМК "Агро" кăçал унăн лаптăкне икĕ хута яхăн ÿстерме пăхать пулсан, купăстапа ĕçлесси районта палăрмаллах ÿсмелле.
Сăвăм ÿсет
Сăвакан пĕр ĕне пуçне тивекен районти вăтам сăвăм паянхи куна 12,55 кг. Вăл иртнĕ çулхи çак вăхăтринчен пысăкрах пулнăран, ăна япăх кăтарту темелле мар. Анчах уйрăм хуçалăхсен сăвăмне пăхсан савăнмалли сахалрах. Асăннă кун тĕлне "Восток" кооператив - 7,6 кг, Чкалов яч. хис. хуçалăх 7,8 кг сĕт суни - пĕчĕкрех кăтарту. Танлаштарма, Суворов яч. хис. хуçалăхра талăкри вăтам сăвăм 17,3 кг, "Оринино" хуçалăхра - 15,3 кг, "Свобода" кооперативра - 14,1 кг, "Ударник" хуçалăхра - 13,7 кг, "Путь Ильича" агрофирмăра - 12,7 кг.
Ĕнесен йышĕ пирки. Çулталăк каялла районти тĕрлĕ харпăрлăх формиллĕ пĕрлешÿллĕ хуçалăхсенче 2090 пуç сумалли ĕне тăнă пулсан, кăçал вăл йыш 85 пуç пĕчĕкрех.
Район паян талăксерен пĕтĕмпе 25156 кг сĕт суни иртнĕ çулхи çак вăхăтринчен 912 кг сахалрах. Сĕт ытларах суни çур акине хатĕрленме ырă витĕм кÿрессине асра тытасчĕ.
А. БЕЛОВ хатĕрленĕ.