Публикации » Чăваш Республикин малашлăхĕшĕн пирĕн пĕрле тăрăшмалла

21 января 2017 г.

Ĕнер, январĕн 20-мĕшĕнче, Чăваш Ен Пуçлăхĕ Михаил Игнатьев Чăваш Республикин Патшалăх Канашне хăйĕн çулленхи Çырăвĕпе тухрĕ. Çырупа вăл Чăваш патшалăх оперăпа балет театрĕнче паллаштарчĕ

Михаил Игнатьев Çырура республика Правительстви, Патшалăх Канашĕ, вырăнти хăй тытăмлăх органĕсем, предприятисемпе организацисем умĕнче тăракан нумай вăхăтлăх тата кĕске тапхăрти задачăсене анлăн çутатрĕ. Çырура асăннă пĕлтерĕшлĕ самантсем пирĕн республикăра пурăнакан кашни çыннах пырса тивеççĕ. Вĕсем, тĕпрен илсен, пĕтĕмпех хамăрăн тăван республикăна малалла та çирĕпрех утăмсемпе аталантарса пырассипе, çынсене ĕçлеме, пурăнма тата канма лайăхрах условисемпе майсем туса парассипе, хамăрăн кулленхи пурнăçа хăтлăрах та тулăхрах тăвассипе çыхăннă.

Çакă та пĕлтерĕшлĕ самант пулса тăрать. Асăннă документа хатĕрленĕ чухне Чăваш Енре пурăнакан çынсен, обществăлла организацисен, граждан обществин ытти институчĕсен представителĕсен шухăш-кăмăлне те шута илнĕ. Кашни çыннăнах Çырăва кĕртме хăйĕн сĕнĕвне пĕлтерме май пулнă. Апла пулсан вăл халăхпа сÿтсе явса хатĕрленĕ, унăн шухăшĕсене палăртакан документ пулса тăрать.

Çырупа паллаштарнине уçă эфирта Чăваш наци телевиденийĕпе кăтартрĕç, Чăваш Республикин влаç органĕсен официаллă порталĕнче те курма май пулчĕ. Çавăн пекех Çырăва вуласа панине Чăваш наци радиовĕн хумĕ çинче те итлеме май килчĕ.

Михаил Игнатьевăн кăçалхи Çырăвĕ çиччĕмĕш пулчĕ. Çырупа паллаштарнипе çыхăннă церемоние Раççей Федерацийĕн Патшалăх Думин депутачĕсем, Чăваш Республикин Патшалăх Канашĕн депутачĕсем, республика ĕç тăвакан влаç органĕсен, федерацин территори органĕсен, муниципалитетсен ертÿçисем, тĕн тата общество организацийĕсен представителĕсем, предприятисемпе организацисен, массăллă информаци хатĕрĕсен представителĕсем йышлă хутшăнчĕç.

Çырупа паллаштарнипе çыхăннă мероприятие район администрацийĕн пуçлăхĕ Ростислав Тимофеев ертсе пынипе пирĕн район делегацийĕ те хутшăнчĕ.

Михаил Игнатьев хăйĕн Çырăвĕнче çак самантсене уйрăммăн палăртрĕ:

Ĕç çыннин çулталăкĕнче республикăра 2700 ĕç вырăнĕ йĕркеленĕ.

Чăваш Енре çемьесем çирĕпленеççĕ, нумай ачаллă çемьесен шучĕ ÿсет.

Республикăра пурăнакансен виççĕмĕш пайĕ çăмăллăхсем илсе тăрать.

Чăваш Ен Пуçлăхĕ хăш-пĕр политика ĕçченĕсене популизмран хăпма чĕнсе каларĕ.

Çуркуннерен тытăнса Чăваш Ен наци телевиденине спутник телевиденийĕпе пăхма май пулĕ.

Чăваш Енре ядерлă медицинăн регионсем хушшинчи центрĕ пулĕ.

Кăçал Шупашкарта çĕнĕ 4 ача сачĕ тата шкул хута кайĕç.

Чăваш Енри чи лайăх шкулсем миллионерсем пулса тăчĕç.

Михаил Игнатьев çемье этикин тытăмĕн урокĕсене шкул программине кĕртме хушрĕ.

Чăваш Енре инженерипе техника вĕренĕвĕн пĕр тытăмлă системи йĕркеленет.

Регионта патшалăх парăмне тÿлемелли расхутсем чакнă.

Чăваш Ен Правительстви промышленноçри пысăк инвестици проекчĕсене укçа-тенкĕ тĕлĕшпе пулăшĕ.

Республикăри промышленноç предприятийĕсенчен 60 процентĕнче ĕç укçи республикăри вăтам кăтартуран пысăкрах.

Чăваш Енре предпринимательсен шучĕ ÿсет.

Хуçасăр çĕрсем пулмалла мар.

Михаил Игнатьев ялта ĕçлекенсен ĕç укçи виçине ÿстерме задача лартрĕ.

Пурăнмалли çурт-йĕре хамăрăн производство материалĕсемпе тума тăрăшмалла.

Республикăра 2017 çулта çынсене ишĕлчĕк çуртсенчен куçармалли программа вĕçленет.

Çул-йĕр тума тата юсама Чăваш Ен 5 млрд тенкĕ уйăрать.

Чăваш Ен - çĕршыври экологи рейтингĕнче малтисенчен пĕри.

Республикăра биатлон комплексĕ уçăлать.

Халăх пĕрлĕхĕн кунĕнче Шупашкарта Туслăх çурчĕ уçăлĕ.