18 января 2017 г.
Чăваш Ен - "пилот" регионĕ
Чăваш Ен йăла каяшне тирпейлессин çĕнĕ йĕрки çине куçассипе "пилот" регионĕсен шутне кĕрет. Кун пирки Чăваш Ен Пуçлăхĕ М. Игнатьев пĕлтернĕ.
РФ çут çанталăк ресурсĕсен тата экологи министрĕ Сергей Донской Чăваш Республикин Пуçлăхĕпе Михаил Игнатьевпа ĕçлĕ тĕл пулу ирттернĕ. Тĕл пулу вăхăтĕнче каяша тирпейлессин системин реформине тата Экологи çулталăкĕн шайĕнчи мероприятисене ирттерме хатĕрленес ĕçсем регионта мĕнле шайра пулнине сÿтсе явнă.
Михаил Игнатьев палăртнă тăрăх, хальхи вăхăтра республикăра каяша пухса тирпейлессин тата утилизацилессин эффективлă комплекслă системи йĕркеленет. Регионăн экологи хăрушсăрлăхне тивĕçтерессипе пысăк пĕлтерĕшлĕ проектсем ăнăçлă пурнăçа кĕреççĕ. Биологилле тасатмалли сооруженисене реконструкци тăвассине тата Çĕнĕ Шупашкарта йăла каяшĕн хальхи полигонне малалла тăвассине РФ Правительстви çирĕплетнĕ мероприятисен планне кĕртнĕ ĕнтĕ. Кунсăр пуçне Питтукасси свалкине рекультиваци тăвассине федераци программине кĕртнĕ.
Ачасем ытларах çуралаççĕ
Январĕн 16-мĕшĕнче Чăваш Республикин Пуçлăхĕ М. Игнатьев Мускавра РФ Президенчĕ çумĕнчи ачасен прависем енĕпе ĕçлекен уполномоченнăйпа Анна Кузнецовăпа тĕл пулнă.
Республика Пуçлăхĕ кăкăр ачисен вилеслĕхне чакарассипе, нумай ачаллă çемьесен шучĕ ÿсессипе Чăваш Ен Раççей субъекчĕсем хушшинче чи малтисенчен пĕри пулни пирки каласа панă. Регионта амăшĕсене тата ачасене пулăшассин ыйтăвĕсене пысăк тимлĕх уйăраççĕ. Чăваш Енре ачасен 38 процентне яхăн е пĕтĕмпе 97 пин ача тĕрлĕрен тÿлев илсе тăрать. Çавна валли 2016 çулта 2,1 млрд тенкĕ уйăрнă. Ачасем çуралассин коэффиценчĕ те (1,9) çĕршывра чи пысăккисенчен пĕри.
Анна Кузнецова регион ертÿçи Михаил Игнатьев Чăваш Енре Амăшĕн тата Ашшĕн çулталăкне ирттернине пысăк хак панă, кунта çĕршыври ытти регионшăн та курăмли тата пĕлтерĕшли сахал мар пулни пирки каланă.