21 декабря 2016 г.
Декабрĕн 16-мĕшĕнче район администрацийĕн пуçлăхĕ çумĕнчи общество канашĕн черетлĕ ларăвĕнче район администрацийĕ граждансен ыйтăвĕсемпе мĕнле ĕçлени пирки сÿтсе яврĕç. Ку ыйтупа район администрацийĕн ĕçĕсен управляющийĕ Александр Краснов тухса калаçрĕ. Лару ĕçне район администрацийĕн пуçлăхĕ Ростислав Тимофеев хутшăнчĕ. Ларăва общество канашĕн председателĕ Валерий Вязов ертсе пычĕ.
Александр Валерианович хăйĕн сăмахĕнче палăртнă тăрăх, район администрацине килекен пĕр çыру та, пĕр ыйту та тимлĕхсĕр юлмасть. Пурне те вăхăтра регистрацилесе хуравсем хатĕрлеме яваплисене çирĕплетсе параççĕ, çыру авторĕсем хуравсене вăхăтра илччĕр тесе тĕрĕслесе тăраççĕ.
Кăçал граждансем район администрацине çырупа пĕтĕмпе 198 хут тухнă. Иртнĕ çул ку вăхăта кун пек заявленисем 284 пулнă. 77 ыйту-çырăва çÿллĕрех шайри организацисенчен ярса панă, коллективпа çырнă çырусем 40 пулнă.
Тишкерÿ çавна кăтартса парать. Район администрацине килекен çырусенчен ытларахăшĕ (54 çыру е 27 процент) строительство ыйтăвĕсемпе çыхăннисем. Коммуналлă тата йăла ыйтăвĕсемпе çыхăннисем 43 çыру, пурăнмалли çурт-йĕр ыйтăвĕсемпе çыхăннисем 35 çыру, социаллă ыйтусемпе çыхăннисем 21 çыру пулнă. Çырусем ытларах Муркаш, Мăн Сĕнтĕр, Катькас, Москакасси, Çатракасси, Ярапайкасси, Ярославка, Ильинка ял тăрăхĕсенчен килеççĕ.
Анчах та çырусене вăхăтра регистрацилесе яваплисене çирĕплетсе парасси - пĕр ыйту. Çыру авторĕсене хурав панине те тĕрĕслесе тăрас пулать вĕт-ха. Общество канашĕн членĕсен ку ыйтăвĕ çине хуравланă май, Александр Валерианович кашни ыйтăвах уйрăм журналта регистраци туни пирки каларĕ. Кашни эрнерех район администрацине килнĕ тата адресатсем патне ăсатнă çырусен мониторингне ирттереççĕ. Çырусене райадминистраци пайĕсенче те регистрацилеççĕ. Сăмах май, Чăваш Ен Пуçлăхĕн Администрацийĕ ирттернĕ тĕрĕслев вăхăтĕнче район администрацийĕнче граждансен çырăвĕсемпе ĕçлессипе асăрхаттарусем пулман.
Район администрацине килекен ыйтусем хушшинче çулсем тăвассипе тата юсассипе çыхăннисем тăтăшах тĕл пулнă пирки район администрацийĕн пуçлăхĕ Ростислав Тимофеев Шупашкар агломерацийĕн транспорт инфраструктурин комплекслă аталану программин проекчĕ çинче те чарăнчĕ. Программăна Раççей стратеги аталанăвĕн шайĕнче пурнăçа кĕртме палăртнă. Ростислав Николаевич ку программăпа килĕшÿллĕн çитес çул туса ирттерме палăртакан ĕçсемпе паллаштарчĕ.
Ларура кун йĕркине кĕртмен ыйтусемпе те анлă калаçу пулчĕ. Общество канашĕн ларăвĕсене вырăнсене тухса йĕркелени пĕлтерĕшлĕрех пулнине палăртрĕç. Çĕнĕ çул уявĕччен шутлă кунсем юлаççĕ. Çавна май Ростислав Николаевич районта ирттерекен Çĕнĕ çул тата спорт мероприятийĕсем пирки каласа пачĕ. Çĕнĕ çул парнисĕр вара районта пĕр ача та юлмалла мар тесе каларĕ.
Ларура çавăн пекех общество канашĕн çитес çулхи ĕç планне сÿтсе явса йышăнчĕç.
В. ШАПОШНИКОВ.