21 декабря 2016 г.
Чăваш биатлон шкулĕн воспитанникĕ Татьяна Акимова Тĕнче кубокĕн виççĕмĕш тапхăрĕнче финиша килнĕ чухне пирĕн республикăра пурăнакансем пĕр вырăнта ларса та çитереймерĕç пулĕ, унăн ылтăнне нумайăшĕ каллĕ-меллĕ утса кĕтсе илнине муркашсенчен те пĕлетпĕр.
Винтовкăран кашни рубежрах тĕл персе Татьяна 7,5 километра 21 минут та 58,9 çеккунтра вĕçлерĕ. Анаис Шевалье унран тăватă çеккунт юлчĕ, Сьюзен Данкли - пилĕк çеккунт. "Тренерсем эпĕ иккĕмĕш пынине пĕлтерсен, манăн шок пулчĕ темелле, эпĕ хăвăртлăха татах хушрăм", - финиш хыççăн çапла пĕлтерчĕ Татьяна "Матч-ТВ" телеканала тÿрĕ эфирта.
Татьяна тĕнче шайĕнчи ылтăн медале çĕнсе илни, хыççăнах тепĕр стартра бронза медале тивĕçни - пирĕншĕн чăнах та мăнаçланмалли пысăк пулăм, мĕншĕн тесен, нумайăшĕ пĕлет ĕнтĕ, Татьяна Акимова пирĕн районтан тухнă паллă биатлонистăн Вячеслав Акимовăн мăшăрĕ.
Çак стартсем пирки эпир В. Егорова ячĕллĕ республикăри спорт шкулĕн Муркашри филиалĕн ертÿçипе курса калаçрăмăр. Акă мĕнле палăртрĕ хăйĕн шухăш-кăмăлне Раççей Федерацийĕн физкультурăпа спортăн отличникĕ, Чăваш Республикин физкультурăпа спортăн тава тивĕçлĕ ĕçченĕ, район депутачĕ Александр СИДЮШКИН:
- Татьяна Акимова пирĕн республика ятне çакăн пек çÿллĕ шая çĕклеме пултарнăшăн питĕ савăнтăм. Стартсене тÿрĕ эфирта пăхрăм. Çак çитĕнÿпе вăл уйрăмах пирĕн районти тата республикăри ачасемшĕн чăн та ырă тĕслĕх пулнине çирĕплетме пултарчĕ.
Татьяна ылтăн медаль çĕнсе илнине, пытарма кирлĕ мар, малтанах нумайăшĕ ăнсăртран тесе шутларĕç пулĕ, анчах чăваш хĕрĕ хыççăнхи стартра бронза медале тивĕçсе ылтăна пысăк ăсталăхпа, ĕçлеме пултараслăхпа çĕнсе илнине кăтартса пачĕ тесе шутлатăп.
Эпир, муркашсем, Татьяна Моисеева биатлонистка 2006-2007 çулсенчи Тĕнче кубокĕн старчĕсенче умлă-хыçлă икĕ кĕмĕл медаль çĕнсе илнине те манмастпăр. Татьяна Акимова вĕреннĕ чух шăпах Татьяна Моисееван тĕслĕхĕ çинче вĕренсе ăсталăха туптанă, йĕлтĕр спортĕнчен биатлона куçрĕ.
Татьяна Акимован малашне те çитĕнÿсем пуласса шанатпăр, кĕтетпĕр.
Н. Николаева хатĕрленĕ.