05 октября 2016 г.
Салтак пулма тивĕçнĕ арçынна чăваш яланах хисепленĕ. Çавăнпа та тус-тăвана, ялта пĕрле выляса ÿснĕ юлташа çара ăсатасси пĕрлехи ĕç шутланнă. Юпа уйăхĕн 1-мĕшĕнчен Раççей Федерацийĕн территорийĕнче çул çитнĕ çамрăксене çар службине илмелли черетлĕ тапхăр пуçланчĕ. Епле хатĕрленчĕ пирĕн район кĕрхи призыва; Мĕн чуль каччăна ăсатăпăр эпир çар ретне; Çак ыйтусем çине хурав шыраса эпир Чăваш Республикинчи çар комиссариачĕн Муркаш тата Элĕк районĕсенчи пайĕн ертÿçине Владимир КАЗАКОВА уçă калаçăва чĕнтĕмĕр.
- Владимир Иванович, малтанах кăçалхи кĕрхи призыв уйрăмлăхĕсемпе паллашар мар-и;
- Кунта пысăк уйрăмлăх пур тесе калассăм килмест. Кĕрхи призыв Раççей Президенчĕн указĕпе 2016 çулхи юпа уйăхĕн 1-мĕшĕнче пуçланчĕ. Çывăх вăхăтра Муркаш районĕнчен кăна 75 каччăна действительнăй çар службине ăсатмалла. Ку тĕллеве пурнăçа кĕртессипе ĕçлеме пуçларăмăр ĕнтĕ. Иртнĕ тунтикунран призывниксен медицина комиссийĕ ĕçлеме тытăнчĕ. Çамрăксем çар службине ăçта тăрассине тĕрĕслесе хак парасси призыв комиссийĕнчен пуçланать.
- Яшсене çара ăсатасси - пĕрлехи ĕç. Иртнĕ çуркунне е кăшт маларах Раççей çарне действительнăй службине ăсатнисем Муркаш ятне ямарĕç пуль;
- Кунта сирĕн ыйтăва çапла хуравлăттăм. Пирĕн яшсем хăйсене Раççей çарĕнче кирек хăш вырăнта та лайăх енчен кăтартаççĕ, шанчăклă тытаççĕ. Ачаран спортпа туслисем тата салтак кайма повестка иличчен кĕрешÿ мелĕпе спорт разрядне тултарма пултарнисене сывлăш-çар десант çарĕсене, тинĕс пехотине, чикĕ хуралне çул уçă. Ыттисем Раççейăн тĕрлĕ кĕтесĕнче службăра тăраççĕ. Салтак кайма хатĕрленннĕ май ДОСААФ автошкулĕсенче çар автомашинисен водителĕсен прависене илнисене çар ĕç специальноçĕллĕ темелле ĕнтĕ.
2016 çулхи кĕрхи призыв пирки çуралакан ыйтусене çар комиссариатĕнчен октябрĕн 7-мĕшĕнче 10 сехетрен пуçласа 12 сехетчен ыйтса пĕлме пултаратăр. Тел: 62-7-01.
- Сывлăх тĕлĕшпе суйлав еплерех;
- Кунта чи юлашки сăмаха медкомисси калать. Сывлăха кура призывниксене çар чаçĕсем тăрăх пайлатпăр. Ыйтуллисене хушма тĕрĕслеве тата сывалма яратпăр. Призывникăн сывлăхне кура медицина комиссийĕ ăна çара чикĕллĕ юрăхлă тесе йышăнсан эпир ăна саппаса кĕртетпĕр. Кунсăр пуçне аслă пĕлÿ заведенийĕсенче вĕренекен призывника çара каяссинчен вăхăтлăха хăварма та (отсрочка) ирĕк пур. Анчах ку çулпа çартан пăрăнса юлнисен вăхăт çитсен пурпĕрех салтак атти тăхăнма тивет.
- Маларах каланисене тĕслĕхсемпе çирĕплетеймĕр-ши;
- Тархасшăн. Пирĕн ентешсем хăйсене çар службинче ырă енчен кăтартнă тĕслĕхсем пĕрре-иккĕ çеç мар. Акă иртнĕ çул пĕтĕм Раççейри танк биатлонĕнче пирĕн ентеш - Ильинка каччи Даниил Храмов - çĕнтерÿçĕ пулса тăчĕ. Аслă пĕлÿ илнĕ хыççăн çара кайса контракт йĕркипе службăра тăракансем те ырă ята тивĕçнисем пĕччен-иккĕн мар. Вĕсем паян Раççейăн кашни кĕтесĕнчех çар службинче тăраççĕ. Чуманкасси ял тăрăхĕнчи Ю. Замятин Хура тинĕсре, И. Потаповпа А. Волков Чăваш патшалăх университетĕнчен вĕренсе тухнă хыççăн контракт йĕркипе Çурçĕр флотĕнче службăра тăма кăмăл турĕç. Вĕсен тантăшĕсем Ю. Шадринпа Н. Осипов аслă пĕлÿ илнĕ хыççăн контракт йĕркипе икшер çул сывлăш-çар десантне службăна васкарĕç. Вĕсемсĕр пуçне хăйсен ирĕкĕпе Инçет Хĕвел тухăçĕнче, Камчаткăра, Сахалинта, Çурçĕр Кавказра службăра тăракансем те пирĕн районтан чылаййăн. Кăçалхи кĕрхи призывран та вĕсен йышĕ хушăнасса шанатăп.
- Призыв хăçанччен пырать тата пирĕн призывниксен служба вырăнĕ ăçта çити сарăлма пултарать;
- Нумай ашшĕ-амăшне хумхантаракан ыйту. 1989 - 1998 çулсенче çуралнă, сывлăх енчен çара кайма юрăхлă каччăсене кăçалхи октябрь - декабрь уйăхĕсенче çара илетпĕр. Вĕсем çĕр çинчи çарсенче, тинĕс-çар флотĕнче, Раççейăн наци гвардийĕнче тата çĕршыв территорийĕнчи ытти çар формированийĕсенче служба тивĕçне пурнăçлĕç.
А. БЕЛОВ калаçнă.
Сăн ÿкерчĕкре: призывниксен медицина тĕрĕслевĕ - çамрăксен çара каймалли юлашки чикки. Районти тĕп больницăри С. Гусак отоларинголог врач черетлĕ призывникăн сывлăхне тĕрĕсленĕ самант.