30 ноября 2016 г.
Кăçал "Чăвашлăха аталантаракан чи лайăх шкул" республика конкурсĕ пирки чылай калаçрĕç. Чăваш наци конгресĕ тата Чăваш Республикин вĕренÿпе çамрăксен политикин министерстви пуçарнă интереслĕ те кирлĕ ĕç пурне те хавхалантарчĕ темелле. Чылай шкул ăмăртăва çулталăкĕпех хатĕрленчĕ: тĕрлĕ мероприяти, уявсемпе конференцисем ирттерчĕç, ачасене вĕрентессинче çĕнĕ методикăсемпе усă курчĕç тата ытти те.
А.Г. Николаев ячĕллĕ Калайкасси вăтам шкулĕ те çак конкурса хутшăнчĕ. Чăваш чĕлхипе литературине вĕрентекен Александр Степанов нарăс уйăхĕнче республика шайĕнчи "Шкул тата чăваш чĕлхи чĕрĕлĕвĕ" конференци ирттерчĕ. Вăл тăрăшнипех Муркаш районĕнче этнолагерьсен проекчĕ ĕçлеме тытăнчĕ. Сехетсем çитмеççĕ пулсан та Александр Марсович алă усмасть, тăван ен культурин урокĕсене кружок евĕр 5-9 классенче ирттерет, пур ачана та явăçтарма тăрăшать.
Чăвашлăха аталантарас ĕçре пĕрлĕх кирлĕ. Класс ертÿçисем, ашшĕ-амăшĕ тăрăшнипе "Этноял" проект ĕçлеме пуçларĕ. Çитес çул ку проекта туллин пурнăçлама вăй çитересшĕн. Вĕрентекенсем çине тăнипе чăваш чĕлхи уйăхлăхĕ те шкулта çÿллĕ шайра иртрĕ.
"Чăвашлăха аталантаракан чи лайăх шкул" республика конкурсне чÿк уйăхĕн 24-мĕшĕнче Шупашкарта пĕтĕмлетрĕç. Çĕнтерÿçĕ шкулсене республикăн вĕренÿ министрĕ Юрий Исаев тата Чăваш наци конгресĕн президенчĕ Николай Угаслов саламларĕç.
Туса ирттернĕ пархатарлă ĕçсене шута илсе Калайкасси шкул коллективĕ Чăваш Республикин Пуçлăхĕн Тав хутне тивĕç пулчĕ. Чăваш наци конгресĕ "Чăвашлăха аталантаракан чи лайăх шкул" конкурсра 3-мĕш вырăн йышăннă Калайкасси шкулне 15 пин тенкĕлĕх грант сертификачĕпе чысларĕ.
Э. ПОРТНОВА.