17 декабря 2016 г.
Районти "Сывлăх" спорт шкулĕнчи бокс секцине çÿрекенсем Çĕнĕ çула чăнах та лайăх кăмăлпа кĕтсе илессинче иккĕленÿ çук, мĕншĕн тесен вĕсем декабрьте виçĕ пысăк ăмăртăва хутшăнса пуринчен те çитĕнÿсемпе таврăнчĕç.
Декабрĕн 1-4-мĕшĕсенче Сергей Черкашин аслă тренер ертсе пынипе çамрăк боксерсем Çĕрпÿ хулинче интернационалист-салтаксене халалланă турнира хутшăнчĕç. 2003-2004 çулсенче çуралнă арçын ачасен йышĕнче тĕрлĕ виçе категорийĕнче Александр Максимов тата Артем Кожевников 1-мĕш вырăнсем, Алексей Петров - 2-мĕш, Максим Долгов 3-мĕш вырăн йышăннă.
Декабрĕн 2-4-мĕшĕсенче вара Олег Сютруков тренер ертсе пынипе 2007-2008 çулсенче çуралнă ачасем Мари Эл Республикинчи бокс турнирне хутшăннă. Козьмодемьянск хулинчи ринг çинче пирĕн районти 9 боксер хăйсен ăсталăхне кăтартнă. Вĕсенчен тăваттăшĕ турнир çĕнтерÿçи пулса тăнă, тепĕр тăваттăшĕ иккĕмĕшпе виççĕмĕш вырăнсене çĕнсе илнĕ.
Декабрĕн 7-11-мĕшĕсенче Балахна хулинче (Чул хула облаçĕ) сывлăш-десант çарĕн генералне В. Маргелова асăнса Пĕтĕм Раççейри бокс турнирĕ иртнĕ. Ку турнира спорт мастерĕн ятне тивĕçес текенсем хутшăннă ("В" класлă ăмăрту).
Пирĕн районти Анатолий Кожевниковпа Алексей Николаев (сăн ÿкерчĕкре) иккĕшĕ те бокс енĕпе спорт мастерĕн нормативне пурнăçлама пултарнă. С. Черкашин (сăн ÿкерчĕкре сулахайри) аслă тренер Алексее турнирти чи лайăх кĕрешÿçĕ тесе хакланăшăн, ятарлă кубокпа наградăланăшăн савăннине пĕлтерчĕ. Каласа хăвармалла, районти çамрăк боксерсем çитĕнÿ тунинче тата тепĕр икĕ тренерăн - Михаил Николаевпа Сергей Черкашинăн (кĕçĕннин) тÿпи те пур.
Н. Николаева.