17 декабря 2016 г.
Чăваш Республикин Общество палатине туса хунăранпа 5 çул çитнине халалласа тата хальхи вăхăтра граждан обществин пĕлтерĕшĕ ÿссе пынине шута илсе декабрĕн 8 - 9-мĕшĕсенче республика тĕп хулинче Чăваш Енри коммерциллĕ мар организацисен II форумне ирттерчĕç. Форум коммерциллĕ мар организацисемпе активлă граждансен, республика патшалăх влаçĕн тата вырăнти хăй тытăмлăх органĕсен 300 ытла представительне пухрĕ.
Район администрацийĕн пуçлăхĕн çумĕ Лилия ТАРАСОВА ертсе пынипе форума район делегацийĕ те хутшăнчĕ. Паян эпĕ Лилия Юрьевнăна форум пирки хăйĕн шухăш-кăмăлне пĕлтерме ыйтрăм:
- Форум пирки пĕтĕмĕшле калас пулсан, вăл обществăпа влаç хушшинчи хальхи хутшăнусене çĕнĕ шая çĕклессипе малалла тунă татах тепĕр утăм пулса тăчĕ тесе шухăшлатăп. Форумпа çыхăннă мероприятисене РФ Общество палатин представителĕсем, Стратеги пуçарăвĕсен агентствин эксперчĕсем, коммерциллĕ мар организацисен, ĕç тăвакан влаç органĕсен тата вырăнти хăй тытăмлăх органĕсен, бизнес представителĕсем йышлă хутшăнчĕç. Вĕсемпе курса калаçма, вĕсен ĕç опычĕпе паллашма интереслĕ пулчĕ, хамăра валли усăллине илме май килчĕ.
Форумра Чăваш Ен Пуçлăхĕ Михаил Игнатьев тухса калаçни халĕ те асрах. "Эпир граждан обществин мĕнпур общество институчĕсене туса хутăмăр. Общество институчĕсем урлă эпир халăхпа тăтăшах калаçатпăр тата республикăра пурăнакан нумай çын шухăшне шута илсе йышăнусем тăватпăр", - терĕ вăл.
Паян пирĕн республикăра коммерциллĕ мар 1378 организаци ĕçлет. Кусем вĕсем общество тата тĕн пĕрлешĕвĕсем, профсоюзсем, политика партийĕсен, обществăлла юхăмсен уйрăмĕсем т. ыт. те. Кунсăр пуçне 16 наци ыйтăвĕсемпе ĕçлекен 34 наципе культура пĕрлешĕвĕ пур.
Общество палати пысăк ĕç туса ирттерет. Вăл паянхи куна Чăваш Енре граждан обществин институчĕсен ĕç-хĕлне йĕркелесе пыракан тĕп орган пулса тăрать.
Республика Пуçлăхĕ Михаил Игнатьев çĕршыв Президенчĕн Владимир Путинăн Çырăвĕ çинче те чарăнса тăчĕ. Çырура çĕршыв Президенчĕ социаллă пĕлтерĕшлĕ коммерциллĕ мар организацисен пысăк пĕлтерĕшĕ пирки те калани пур.
Форума хутшăнакансем Чăваш Ен Пуçлăхĕ патне коммерциллĕ мар организацисен социаллă проекчĕсем валли кашни çул грант уйăрса парса пулăшассине малалла та туса пырассин пуçарăвĕпе тухрĕç. Çак проектсене пурнăçа кĕртсе пыни пирĕн региона граждан обществин çĕнĕ шайне çĕкленме май парĕ.
Форум шайĕнче пленарлă лару иртрĕ, калаçу площадкисем, çавра сĕтелсем ĕçлерĕç. Республикăри уйрăмах палăрнă активистсене пленарлă лару вăхăтĕнче тĕрлĕрен награда парса чысларĕç.
"Экологи пĕлĕвĕ тата общество экологи тĕрĕслевĕ" темăпа çавра сĕтел пулчĕ. "ЭКА" экологи организацийĕн ĕçĕ-хĕлĕ, унăн ĕç енĕсемпе формисем çинчен каласа пачĕç. Мероприятие хутшăнакансем çавăн пекех "Управление отходами" ЗАО-н Çĕнĕ Шупашкарти каяш сортлакан комплексĕн ĕçĕ-хĕлĕпе паллашма пултарчĕç. Тĕл пулу вĕçĕнче çитĕнекен ăрăвăн тата аслисен экологи пĕлĕвĕн ыйтăвĕсене тишкертĕмĕр, ку енĕпе малалла тухăçлăрах ĕçлессипе сĕнÿсене сÿтсе яврăмăр. Секцин ĕç итогĕсене пĕтĕмлетсе форумăн пĕтĕмлетÿ резолюцийĕ валли сĕнÿсем йĕркелерĕмĕр. Пĕлтерĕшлĕрех сĕнÿсем Чăваш Республикин Общество палати йĕркелекен çул-йĕр карттине кĕрĕç.
Кунсăр пуçне "Пуласлăхри Чăваш Ен: 2030 çулчченхи аталану стратегийĕ", "Çынсен сывлăхне сыхласси - обществăн тĕп тивĕçĕ", "Çамрăксен кадр тата социаллă проекчĕсем", "Влаç тата общество хутшăнăвĕсен пахалăхĕ: общество тĕрĕслевĕ тата экспертиза" темăсемпе те çавра сĕтел калаçăвĕсем çÿллĕ шайра иртнине палăртмалла.
Çавăн пекех форумра Чăваш Республикинчи чи ăнăçлă ĕçлесе пыракан коммерциллĕ мар организацисен ĕçĕ-хĕлĕпе паллашма май пулчĕ. Унта хутшăнни пирĕншĕн пуриншĕн те усăллă пулни пирки иккĕленÿ çук. Форумра курни-пĕлни пире малашне хамăр патра граждан обществин принципĕсене аталантарса пырассипе татах ăнăçлăрах ĕçлесе пыма пулăшĕ.
В. ШАПОШНИКОВ калаçнă.