17 декабря 2016 г.
Ял çыннисемпе
тĕл пулаççĕ
Декабрĕн 21-мĕшĕнче республикăра, вăл шутра пирĕн районта та, черетлĕ Пĕрлехи информаци кунĕ иртет. Унăн теми - Раççей Президенчĕн В. Путинăн РФ Федераци Пухăвне янă Çырăвĕ. Çавăн пекех информаци кунĕнчи тĕл пулусенче Чăваш Республикин Пуçлăхĕн 2017 çулта республикăра Амăшĕн тата Ашшĕн çулталăкне ирттересси пирки калакан указне пурнăçа кĕртесси, пахалăхсăр алкоголь тата спирт продукцине сарăлма парас марри, Çĕнĕ çул тата Раштав уявĕсем вăхăтĕнче, çавăн пекех хĕллехи тапхăрта пушар тухасран асăрханасси пирки сÿтсе явĕç. Информаци кунне ирттерме района ЧР гражданла оборона тата чрезвычайлă лару-тăру ĕçĕсен патшалăх комитечĕн председателĕ В. Петров ертсе пыракан ушкăн килет. Тĕл пулусене кашни ял тăрăхĕнчех йĕркелеççĕ.
Премие тивĕçнĕ
РФ Вĕренÿ тата наука министерствин хушăвĕпе килĕшÿллĕн пултаруллă яш-кĕрĕме хавхалантарма паракан 30 пин тенкĕ премие Алена Кроликова тивĕçнĕ. Алена Муркаш шкулĕнче 10-мĕш класра вĕренет, шкулти "Родина" çарпа патриотика клубĕн членĕ. Сăмах май, асăннă премие тивĕçнисем Чăваш Республикинчен 8-ăн кăна.
Коррупци çулне
пÿлмелле
Районти коррупципе кĕрешекен канаш ларăвĕ иртнĕ. Ларура муниципалитет пурлăхне шута илессипе, унпа усă курассин эффективлăхне ÿстерессипе, муниципалитет пурлăхĕпе çĕр участокĕсен инвентаризацине ирттерессипе, унăн итогĕсене муниципалитет йĕркеленĕвĕсен администрацийĕсен сайчĕсенче тата массăллă информаци хатĕрĕсенче вырнаçтарассипе çыхăннă ыйтусене тишкернĕ. Ларăва канаш ертÿçи И. Николаев ертсе пынă. Хăйĕн сăмахĕнче район администрацийĕн пурлăх тата çĕр хутшăнăвĕсен пайĕн пуçлăхĕ И. Захаров вырăнсенче тĕрĕслевсем ирттернĕ май муниципалитет пурлăхĕпе тата çĕр участокĕсемпе усă курассипе тупса палăртнă çитменлĕхсем çинче тĕплĕ чарăнса тăнă. Район администрацийĕн пуçлăхĕ Р. Тимофеев ку енĕпе ĕçсене татах активлăлатма сĕннĕ.
Çул çинче инкек
ан пултăр
Районти çулсем çинчи инкексене асăрхаттарассипе ĕçлекен комиссин анлă ларăвĕнче палăртнă тăрăх, кăçалхи 11 уйăхра çулсем çинче инкек-синкек пуласси иртнĕ çулхи çав вăхăтринчен чакнă. Патшалăх çул-йĕр хăрушсăрлăх инспекцийĕн районти пайĕн пуçлăхĕн тивĕçĕсене пурнăçлакан А. Щербаков палăртнă тăрăх, ку тĕлĕшпе тĕрлĕрен рейдсем, тĕрĕслевсем ирттернин усси çук мар.
Ларура район администрацийĕн пуçлăхĕ Р. Тимофеев çулсене хĕллехи вăхăтра тытса тăрассипе ял тăрăхĕсен пуçлăхĕсене хушусем панă.
В. ШАПОШНИКОВ хатĕрленĕ.