26 ноября 2016 г.
"Тÿрĕ ыйту - тÿрĕ хурав" линийĕ çине ку ыйтупа пирĕн пата Шетмĕпуç ял тăрăхĕнчи Катăкуй ялĕнче пурăнакан Алексей Петров шăнкăравласа тухрĕ. Алексей Петрович каласа панă тăрăх, вăл хăйĕн килĕнче çăл алтнă. Паллă ĕнтĕ, харпăр хăйĕн çăлĕнче шыв пахалăхĕ мĕнле пулнине кирек камăн та пĕлес килет. Мĕншĕн тесен куллен усă куратăн унпа.
Çапла вара вăл шыв пахалăхне тĕрĕслеттерес тесе сывлăх сыхлавĕн федерацин "Гигиенăпа эпидемиологин Чăваш Республикинчи Çĕнĕ Шупашкар хулинчи центрĕ" патшалăх учрежденийĕн районти филиалĕпе (унччен ăна районти санитарипе эпидемиологи станцийĕ теттĕмĕр) çыхăннă. Кăлăхах. Кун пек анализсене халĕ кунта туса ирттермеççĕ иккен.
Филиал специалисчĕсем ăна Çĕнĕ Шупашкар хулинче вырнаçнă учрежденипе çыхăнса пăхма сĕннĕ. Кунтан та ветеран тивĕçтерекен хурав кĕтсе илеймен. Вĕсем уйрăм çын çăлĕнчи шыв анализĕсене тумаççĕ иккен. Предприяти-организаци тивĕçтерсе тăракан шыв пахалăхне кăна тĕрĕслесе хаклаççĕ.
Аптăранă енне ĕç ветеранĕ пирĕн пата шăнкăравларĕ, ку ыйту хăйне кăна мар, ытти çынна та интереслентерме пултарни пирки каларĕ. "Малтанхи вăхăтра районти санитарипе эпидемиологи станцийĕн специалисчĕсем вырăнсене тухса хăйсемех çăл куçсенчи, çăлсенчи, шыв башнисенчи ĕçмелли шыв пахалăхĕн тĕрĕслевĕсене ирттеретчĕç. Ăнланатăп, халĕ пĕтĕмпех укçалла пулĕ ĕнтĕ. Укçине те хамах тÿлеме хатĕр. Апла пулин те шыв пахалăхĕн анализне ниçта та тутарма май килмест", - тет вăл.
Алексей Петрович, чăннипех те сире тивĕçтерекен хурав тупма çăмăлах пулмарĕ. Яваплă çынсенчен "Тÿрех калатăп, харпăр хăйĕн çăлĕнчи шыв пахалăхне палăртма анализ ирттериччен ирттерменни лайăхрах" текенни те пулчĕ. Ку ĕнтĕ артезиан скважининчен илекен шыв та чылай чухне пахалăхĕпе тивĕçтерсех каймасть пулсан, 8 - 9 метр тарăнăшне алтнă çăлран илекен шыв пахалăхĕ пирки калаçни те кăлăхах тенине пĕлтерчĕ пулĕ. Ĕçме-çиме усă куракан шыв валли фильтр лартма сĕнекенсем те, ĕçмелли шыва вĕретмесĕр ĕçмелле марри пирки асăрхаттаракансем те тупăнчĕç. Шыв пахалăхне тĕрĕслеттерес пулсан, пĕр çĕрте мар, сахалтан та икĕ çĕрте тĕрĕслеттерсе пăхмалли пирки калакан та тупăнчĕ. Пахалăх кăтартăвĕсем пĕрин те пĕр пек пулас марри пирки малтанах астутарчĕ.
Мĕнех калас, хăйне май пурте тĕрĕсех калаççĕ пулĕ. Шыва вĕретсе ĕçмелли те, фильтр лартсан лайăхрах пуласси те паллă. Фильтр лартас пулсан та вара шыв пахалăхне пĕлни лайăхрах. Мĕншĕн тесен специалистсем мĕнле фильтр суйласа илмеллине сĕнме пултараççĕ. Мĕншĕн тесен шыва мĕнрен тасатмаллине пĕлмелле пулĕ; Шыв пахалăхне палăртассипе те кăтартусем тĕрлĕрен пулма пултараççĕ. Анализсем тĕрлĕрен вĕт-ха.
Апла пулин те сире, Алексей Петрович, пĕр организацие сĕнме пултаратăп. Ку вăл (вырăслах илсе кăтартатăп) - филиал "Центр лабораторного анализа и технических измерений по Чувашской Республике" ФГУ "Центр лабораторного анализа и технических измерений по ПФО". Ячĕ сумлине кура филиалăн сумĕ те çук мар пулĕ тетĕп. Адресĕсем: Шупашкар хули, Чапаев урамĕнчи 7 а çурт тата Мускав проспектĕнчи 90Ÿ2 çурт. Телефонĕ: (8352) 55-19-12. E-Mail, clati-chuvashia@mailĕruĕ
Лаборатори пуçлăхĕ - Светлана Рюриковна Васильева. Тел.: (8352) 28-76-59* (8352) 28-76-17 (факс)* (8352) 28-85-85 (факс).
Кĕскен çавна каласа хăварасшăн. Филиал лабораторийĕнче граждансем тата организацисем усă куракан тĕрлĕ йышши шывăн хими тата радиологи анализĕсене туса ирттереççĕ. Ĕçмелли шыв СанПиН 2.1.4.1074-01 требованийĕсене мĕнле тивĕçтернине палăртаççĕ. Шывра металл ионĕсем, анионсем, АПАВ, фенолсем тата ытти наркăмăшлă япаласем пуррипе çуккине тĕрĕслеççĕ. Ирттернĕ тĕрĕслев кăтартăвĕсем тăрăх шыв СанПиН 2.1.4.1074-01 требованийĕсене тивĕçтерни пирки протокол параççĕ.
Шыва çăлрине те, çăл куçрине те, скважинăрине те, пăрăхран тухаканнине те тĕрĕслеттерме май пур. Тĕрлĕ тĕрĕслев ирттерме хакĕсем тĕрлĕрен. Калăпăр, база анализĕ ирттерме (12 кăтарту) 1892 тенкĕ тÿлеме тивет. Çăлран илекен шыв пахалăхне палăртма (20 кăтарту) 4406 тенкĕ тÿлемелле пулать. Шыв анализĕн хакĕсем пирки ыйтса пĕлмелли телефон номерĕ: 8-8352-28-76-59.
Шыва анализ валли мĕн чухлĕ, мĕнле савăтра илсе пымалли пирки тĕплĕнрех филиала шăнкăравласа ыйтса пĕлме сĕннĕ пулăттăм.