26 ноября 2016 г.
Эпĕ "Ударник" хуçалăхри лару-тăрупа тĕплĕнрех паллашма правлени çуртне çул тытрăм. Манăн телее хуçалăх ĕçне ертсе йĕркелесе пыракан Алан Ногаев вырăнтах пулчĕ. Çамрăк çын мана кăмăллăн кĕтсе илчĕ, хуçалăх ĕçĕ-хĕлĕпе паллаштарчĕ.
- Кĕрхи культурăсене 850 гектар çинче акса хăвартăмăр. Юнашарти Мичурин хуçалăх территорийĕнчи 250 гектарлă уй-хире те ака-суха тума вăй-хăват çитертĕмĕр, - паллаштарать хуçалăх ĕçĕ-хĕлĕпе Алан Ногаев.
Вăл каланă тăрăх, Осети тăрăхĕнче çуралса ÿснĕ. Унта ытларах сăртлă, туллă çĕрсем, çавăнпа та вăл тата унти ĕçченсем кунти уй-хире мухтаççĕ, май пур таран ытларах çĕре пусă çаврăнăшне кĕртессишĕн тимлеççĕ.
Ял хуçалăх ĕçĕ епле пырасси çанталăкпа тÿрремĕнех çыхăннă çав, çулпа çул пĕр пек килмест. Акă кăçал çĕр улми кăларса пуçтармалли вăхăтра тăтăшах çумăр çуса тăчĕ. Çакă, паллах, хуçалăха кулленхи ĕçре самай пысăк йывăрлăх кÿчĕ. Çапах та тăрăшуллă инвесторсем малашне те ку енĕпе ĕçлеме палăртаççĕ, çитес çул ăнăçлăрах пуласса шанаççĕ. Алан Ногаев палăртнă тăрăх, çĕр улми кăлармалли сакăр комбайн пур.
Халĕ хуçалăхра çĕр улми суйлас хĕрÿ тапхăр пырать. Лаборатори ертÿçипе Марина Романовăпа та тĕл пулса калаçрăм. Вăл палăртнă тăрăх, 1000 ытла тонна çĕр улми управа хурса хăварнă, çынсем ÿркенмеççĕ, тăрăшаççĕ.
Эпĕ çĕр улми суйланă çĕре те çитрĕм. Çынсем икĕ сортировкăпа ĕçлеççĕ. Шултра сортлине сеткăсене тултараççĕ. Çак кунсенче кăна автомашинăсемпе тиесе ăсатнă. Çитес çулхи тухăç пирки те халех тимлемеллине тĕпе хурса вăрлăхлăх та уйăрса хăвараççĕ. Ĕçлекенсем Матьăк, Йÿçкасси ялĕсенчен килсе çÿреççĕ.
Хуçалăх тĕрлĕ енлĕ ĕçлеме тăрăшать. Кукурузăна пĕтĕмпе 270 гектар çинче акнă. Çак культура выльăх-чĕрлĕхшĕн питех те паха апат шутланать. Кукурузăна 170 гектар çинчен çапса тĕшĕленĕ, Италире туса кăларнă агрегатпа типĕтсе кĕртнĕ. Инвесторсен ĕмĕчĕсем питех те пысăк. Малашнехи ĕçсем те вĕсен ăнса пыччăр.
И. Яковлев.