29 июня 2016 г.
Иртнĕ эрнекун, июнĕн 24-мĕшĕнче, Чăваш Ен хăйĕн тĕп уявне - Республика кунне - паллă турĕ. Çĕкленÿллĕ, хавас кăмăл-туйăмпа, чун хăпартланăвĕпе уявларĕç Республика кунне Чăваш Ен çыннисем тата республикăмăра килнĕ сумлă хăнасем. Муркаш районĕ те уява активлă хутшăнчĕ.
Экономика форумĔнче
Республика кунĕпе çыхăннă уяв мероприятийĕсем иртнĕ кунсенче сахал мар пулчĕç. Майăн 23-мĕшĕнче Шупашкарта "Раççей регионĕсем - аталанăвăн çĕнĕ вырăнĕсем" IX экономика форумĕ ĕçлерĕ. Форума хутшăнакансене Чăваш патшалăх оперăпа балет театрĕнче Чăваш Республикин Пуçлăхĕ Михаил Игнатьев саламларĕ.
Экономика форумĕн шайĕнче çав кун пĕр-пĕринпе килĕштерсе ĕçлессин, производствăна аталантарассин, хамăрăн продукци конкурентлăхне ÿстерессин, пĕчĕк тата вăтам бизнеса аталантарассин, çамрăксен пултарулăхне аталантарма майсем туса парассин, чăх-чĕп ĕрчетессин, социаллă проектсене пурнăçа кĕртессин, ял хуçалăхне аталантарассин тата ытти ыйтупа тĕрлĕ шайри канашлусемпе конференцисем, семинарсемпе çавра сĕтелсем, сессисем иртрĕç. Вĕсенчен ытларахăшĕ Чăваш наци библиотекинче ĕçлерĕ. Асăннă мероприятисене район администрацийĕн яваплă ĕçченĕсем те активлă хутшăнчĕç.
Республикăн инвестици
майĔсем пысăк
Çав кунах "Экспо-Контур" комплексăн суту-илÿпе выставка комплексĕнче регионсем хушшинчи "Регионсем - килĕштерсе ĕçлессин чикки çук" XXIII выставка ĕçлеме пуçларĕ. Выставкăна савăнăçлă лару-тăрура Чăваш Ен Пуçлăхĕ Михаил Игнатьев уçрĕ, унта хутшăнма кăмăл тунисене тата курма пухăннисене тав турĕ.
Республика Пуçлăхĕ асăннă выставкăна ирттересси йăлана кĕнине палăртрĕ. Вăл республикăн инвестици илĕртÿлĕхне ÿстерме пулăшни пирки каларĕ. Экономикăри йывăрлăхсене пăхмасăрах республика аталанать, регионсем тата çĕршывсем шайĕнче çыхăнса ĕçлесси сарăлса пырать. Итали çĕршывĕн делегацийĕ выставкăна хутшăнма кăмăл туни те çавна лайăх çирĕплетет.
Салам сăмахĕсене çавăн пекех Раççей Федерацийĕн Федераци Пухăвĕн Федераци Канашĕн членĕ Вадим Николаев каларĕ, Раççей чăннипех те хăйĕн регионĕсемпе хăватлă пулнине палăртрĕ.
Чăваш Ен Пуçлăхĕ Чăваш Республикин ĕç тăвакан влаç органĕсен, муниципалитет районĕсемпе хула округĕсен администрацийĕсен, предприятисен экспозицийĕсемпе паллашрĕ. Вĕсем республикăн инвестици майĕсене тата унăн аталанăвĕн малашлăхне лайăх кăтартса параççĕ.
Муркашсем - выставкăра
Республика Пуçлăхĕ Михаил Игнатьев Муркаш районĕн экспозицийĕсене те асăрхамасăр иртмерĕ. "Малалла çирĕпрех утăмламалла пултăр, татах пысăкрах çитĕнÿсем сунатăп", - терĕ вăл. Муркашсен малашлăх планĕсем вара чăннипех те пĕчĕк мар. Вĕсемпе стендсенче туллин паллашма май пулчĕ.
Акă Оринин ял тăрăхĕн территорийĕнчи 10 гектара яхăн лаптăк çинче промышленноç производстви валли инвестици площадки хатĕрленĕ. Проектăн хакĕ - 200 млн тенкĕ. Кунта çывăх вăхăтрах танк-контейнерсем туса кăлармалли çĕнĕ цех ÿссе ларĕ.
Район туристсем валли илĕртÿллĕ пулса тăрать. Атăл юханшывĕн хĕрринче "Волжский эксклюзив", федерацин М 7 трасси çинче "Престиж" субкластерсем пурнăçа кĕртме палăртнă. Район территорийĕнче культура палăкĕсем сахал мар. Страус ферми те пур.
Çавăн пекех "Агрико" ООО, "Путь Ильича" агрофирма, "Муркашри кирпĕч завочĕ" ПАО, "ТрубпластÇ" ООО ĕçĕ-хĕлĕпе те паллашма интереслĕ пулчĕ.
Михаил Васильевич "Моргаушская" чăх-чĕп фабрики" ОАО выставки умĕнче те чарăнчĕ, предприяти ĕçĕ-хĕлĕпе интересленчĕ. Предприяти кăçалхи пилĕк уйăхра продукци туса кăларассине пĕлтĕрхи çав вăхăтринчен 5,3 процент ÿстернĕ. Тăрăшуллă коллектива республика Пуçлăхĕ ăнăçу сунчĕ. Сăмах май, иртнĕ çул итогĕсемпе чăх-чĕп фабрикин коллективĕ республикăри чи ăнăçлă ял хуçалăх предприятийĕсен рейтингĕнче тивĕçлипех 8-мĕш вырăн çĕнсе илме пултарнă.
* * *
Кунсăр пуçне çав кунах "Руç ăстисем" декораципе прикладной искусство ăстисен ĕçĕсен Пĕтĕм Раççейри XIV конкурсĕ тата Пĕтĕм Раççейри халăх пултарулăхĕн "Раççей çăл куçĕсем" XXIV фестивалĕ иртрĕç.
Акатуй хавас кăмăл парнелерĔ
Тепĕр кунне, июнĕн 24-мĕшĕнче, Республика кунĕн тĕп уявĕ - пĕтĕм чăвашсен 4-мĕш Акатуйĕ кĕрлерĕ. Ăна савăнăçлă лару-тăрура уçнă май Чăваш Ен Пуçлăхĕ Михаил Игнатьев республикăра пурăнакансене тата республика хăнисене уявпа саламларĕ, çак уяв вăл çĕр ĕçченĕсен, хăйсен пархатарлă ĕçĕпе çынсене ырлăх-пурлăх кÿрекенсен уявĕ пулнине, вăл халăхсене пĕтĕçтернине палăртрĕ.
Акатуйра Муркаш фермерĔсене те чысларĔÇ
Акатуя савăнăçлă лару-тăрура уçнă чухне республика Пуçлăхĕ Михаил Игнатьев "Фермер хуçалăхĕ - ăнăçлă ĕç вырăнĕ" конкурс çĕнтерÿçисене сертификатсем пачĕ. "Ăрусен çыхăнăвĕ" номинацире пирĕн районти çамрăк фермер Алина Афанасьева çĕнтерÿçĕ пулса тăнă.
Михаил Васильевич çавăн пекех пуçласа хресчен (фермер) ĕçне тытăнакансене тата çемье ферми йĕркелекенсене 2016 çулта гранта тивĕçнине çирĕплетекен сертификатсем пачĕ. Кун пек сертификатсене пирĕн районти Владимир Филиппов, Андрей Сорокин, Татьяна Волкова тивĕçрĕç.
Ташă-юрăра та эпир маттур
Республикăри халăх художество пултарулăх коллективĕсен смотрĕнче мала тухнă коллективсем гала-концертăн тĕп сцени çинче хăйсен пултарулăхĕпе савăнтарчĕç. Муркашри Культура çуртĕнчи ветерансен халăх хорĕн, Мăн Сĕнтĕрти Культура çуртĕнчи вокалпа инструментсен "Картина" ансамблĕн, Москакассинчи Культура çуртĕнчи "Шуçăм", Ярапайкассинчи Культура çуртĕнчи "Екрем", Мăн Токшикри Культура çуртĕнчи "Тăванлăх" халăх коллективĕсен ташши-юррине куракансем ăшшăн йышăнчĕç, коллективсем лауреат дипломĕсене тивĕçрĕç. Асăннă коллективсем Лакрей вăрманĕн сцени çинче те хăйсен пултарулăхĕпе савăнтарчĕç. Москакассинчи Культура çуртĕнчи "Калинка" тĕслĕхлĕ ташă коллективĕ вара "100 пин юрă çĕршывĕнче" гала-концерта уçнă çĕре хутшăнма тивĕçрĕ.
Ăстасем хамăр хушăрах
Пирĕн районăн Хĕрлĕ тÿремре тата Амăшĕн монуменчĕ таврашĕнче вырнаçнă этнокультура картишĕсенчен çын татăлмарĕ.
Республика Пуçлăхне Михаил Игнатьева Алевтина Семенова çемйипех пыл хурчĕсем ĕрчетессипе ĕçлени пирки хавхаланса каласа пачĕ, чĕнтĕр ăсти Тамара Петрова хăйĕн ĕçĕсемпе паллаштарчĕ.
Муркаш районĕн хăва хуллинчен çыхса ăсталанă çурчĕ Амăшĕн монуменчĕ патĕнче катаранах курăнать. Муркаш районĕн иккĕмĕш палатки те юнашарах. Çыхнă çуртра муркашсем хăнасене йышăнчĕç. Ăна ăсталаканĕ вара - Çатракасси ял тăрăхĕн пуçлăхĕ Геннадий Трофимов. Сĕтел-пуканĕ вара пĕтĕмпе тенĕ пекех Петр Мазуркин йывăçран касса ăсталанăскерсем.
Руслан Корпусовăн, Маргарита Пушкареван, Тамара Петрован ал ĕçĕсемпе те паллашма кăмăллă пулчĕ.
В. ШАПОШНИКОВ.