23 июня 2016 г.
Апат хушăнать
Районти пĕрлешÿллĕ кооперативсемпе хресчен (фермер) хуçалăхĕсем паян выльăх апачĕ янтăлассипе тăрăшса ĕçлеççĕ. Оперативлă кăтартусене пăхсан, ĕнерхи кун тĕлне районти çĕр ĕçченĕ утă хатĕрлессипе палăртнă плана 20 процент ытларах (975 тонна) пурнăçланă. Ку ĕçре хальлĕхе Суворов яч. хис., Ильич яч. хис., "Герой" хуçалăхсем тăрăшуллăрах.
"Свобода" (650 тонна), "Путь Ильича" агрофирма (590 тонна), "Герой" (460 тонна) сенаж янтăланă. Выльăх апачĕ хатĕрлесси ытти хуçалăхра та вăй илсех пырать.
Ача садне юсама
Иртнĕ кунсенче район администрацийĕн пуçлăхĕ Р. Тимофеев Мăн Сĕнтĕрти "Мечта" ача садĕнче çĕнĕ вĕренÿ çулне хатĕрленесси çине мĕнле пăхнипе паллашрĕ.
Шкул çулне çитмен ачасен учрежденийĕнче юсав ĕçĕсем ирттерме район бюджетĕнчен 1,3 миллион тенкĕ уйăрнă. Çак укçа-тенкĕпе ача садĕнче çурла уйăхĕччен шыв тата канализаци пăрăхĕсене, электричествăпа тивĕçтерес тытăма юсама, чÿречесене улăштарма, вăйă пÿлĕмĕсене çĕнетме пăхнă.
Шкулсене çĕнетме
Район администрацийĕ вĕренÿ учрежденийĕсене çĕнĕ вĕренÿ çулне хатĕрлессипе паянах пысăк тимлĕх уйăрать. Мăн Сĕнтĕрти вăтам шкулăн спорт залне юсама республика бюджетĕнчен 888 пин тенкĕ уйăрнă пулсан, район бюджечĕ те çак ĕçсем валли 100 пин тенкĕ пăхса хăварнă. Çак виçе шайĕнчех Калайкассинчи вăтам шкулти спорт залĕнче те çĕнĕ вĕренÿ çулĕ пуçланиччен юсав ĕçĕсем ирттермелле.
Спорт фестивалĕнче
Паянхи пурнăçра сывă пурнăç йĕрки мала тухнине кашниех куратпăр. Иртнĕ эрнере Муркашри вăтам шкулта вĕренекенсен команди Кÿкеçре иртнĕ пĕтĕм Раççейри физкультурăпа спорт комплексĕн (ГТО) республикăри çуллахи спорт фестивальне хутшăнса район ятне хÿтĕлерĕ. Пирĕн яшсемпе хĕрсем унта хăйсене ырă енчен çеç кăтартрĕç. Икĕ куна тăсăлнă ăмăртусенче активлăхпа палăрса 26 команда хушшинче пирĕннисем 3-мĕш вырăн йышăнма пултарнă.
Вăрçăра вилнисене асăнса
Асăнупа хурлăх кунĕнче Муркашри Çĕнтерÿ паркĕнче Аслă Отечественнăй вăрçăра вилнисене асăнса лартнă палăк умĕнче митинг иртрĕ. Унта район администрацийĕн яваплă ĕçченĕсем, вăрçăпа ĕç ветеранĕсен районти канашĕн членĕсем, Муркаш шкулĕнчи "Родина" патриотика клубĕн членĕсем хутшăнчĕç. Район администрацийĕн пуçлăхĕ Р. Тимофеев, Муркаш ял тăрăхĕн пуçлăхĕ С. Ермолаев тата ыттисем вăрçăра вилнисене асăнса лартнă палăк умне чĕрĕ чечексем хучĕç.
А. БЕЛОВ,
В. ШАПОШНИКОВ хатĕрленĕ.