21 июня 2016 г.
Ĕнер Шупашкарта çăмăл атлетика енĕпе Раççей чемпионачĕ пуçланчĕ.
Чăваш Ен Раççей чемпионатне иккĕмĕш çул умлă-хыçлă йышăнать. Юлашки сакăр çул хушшинче вара - пиллĕкмĕш хут. Ăмăртусем "Олимпийский" стадионта иртеççĕ. Каласа хăвармалла, пĕлтĕр çак вырăнта Европăн команда чемпионачĕ иртнĕччĕ. Ун чухне ăна континет çинче иртнĕ чи лайăх чемпионатсенчен пĕри тесе хакларĕç.
Раççей чемпионатне вара çĕршывăн 60 регионĕнчи 774 спортсмен хутшăнать. Вĕсен йышĕнче: Раççейĕн тава тивĕçлĕ спорт мастерĕсем 31 çын, тĕнче класлă спорт мастерĕ - 156, Раççей спорт мастерĕ - 411.
Тăватă куна тăсăлакан ăмăртусенче медальсен 42 комплектне выляттараççĕ.
Ăмăртусенче тĕнчипе паллă спортсменсем те вăй виçеççĕ. Вĕсен йышĕнче шăчăпа сикессин тĕнче рекордсменĕ Елена Исинбаева, çÿллĕшне сикессипе Олимп чемпионĕсем пулнă Иван Ухов тата Андрей Сильнов тата ыттисем те.
Чемпионата çутатма Европăри тата Раççейри ертсе пыракан массăллă информаци хатĕрĕсен пурĕ 100 ытла журналисчĕ аккредитациленнĕ.
Ăмăртусем пыракан кунсенче стадиона кĕнĕ билетсене выляттарса парнесем параççĕ. Пĕр кунлăх билет хакĕ 50 тенкĕ кăна. Вĕсене стадион кассинче тата "Чебоксары Арена" пăр керменĕн стадионĕсенче те туянма пулать.
Ăмăртусене Интернетпа пăхма та май туса панă. Вĕсене Раççейри çăмăл атлетика федерацийĕн тата Чăваш Ен Спорт министерствин сайчĕсенче сăнама пулать.
Раççей чемпионатне хутшăнакан спортсменсем çак ăмăртура çĕнтерсе кăçалхи Олимп вăййисене кайма суйланмаллаччĕ, анчах Çăмăл атлетика федерацийĕсен пĕтĕм тĕнчери канашĕн йышăнăвĕ Раççей спортсменĕсем майлă пулман. Канаш Раççей спортсменĕсене пĕтĕм тĕнче шайĕнче иртекен ăмăртусене хутшăнтарма чарас тапхăра тата тăсма йышăннă. Çавăнпа та Раççей çăмăл атлечĕсем 31-мĕш Олимп вăййисене хутшăнаймасан та пултараççĕ. Олимп вăййисем август уйăхĕнче Бразилири Рио-де-Жанейрора иртеççĕ.
Июнь уйăхĕн пуçламăшĕнче Чăваш Ен Спорт министерствин канашлăвĕнче чăваш спортсменĕсем Рио-де-Жанейрора иртекен çуллахи Олимп вăййисене хутшăнасси пирки сÿтсе явнăччĕ. Спорт министерствин сайтĕнче пĕлтернĕ тăрăх, хальхи вăхăта çак тăватçуллăхăн тĕп старчĕсене хутшăнма тăватă чăваш спортсменĕ лицензи илнĕ. Вĕсем: 2012 çулти Олимп вăййисен марафонри бронза призерĕ Татьяна Архипова, 2008 çулхи Олимп вăййисен бронза призерĕ Ирина Калентьева, 2013 çулти Универсиадăн кĕмĕл призерĕ, Наганори марафон çĕнтерÿçи Алина Прокопьева тата йывăр атлетикăра Европа чемпионĕ, Раççей чемпионачĕн кăçалхи кĕмĕл призерĕ Наталья Хлесткина.