25 мая 2016 г.
Хастар çамрăксем, сассăра парăр!
Муркаш район администрацийĕн йышăнăвĕпе районти ĕçлекен çамрăк специалистсене, 21-30 çултисене, ятарлă стипенди парса хавхалантарма йышăнни пирки маларах пĕлтернĕччĕ.
Çак стипендие Муркаш районĕнче пурăнакан, производствăра, спортра, пултарулăхра тата обществăлла ĕçре çитĕнÿсем тунă ĕçлекен çамрăксем тивĕçеççĕ. Организацисенчен стипендие илме тăратнă кандидатсен докуменчĕсене майăн 20-мĕшĕччен йышăнма пулнăччĕ. Çак тапхăра майăн 30-мĕшĕччен тăснă, çавăнпа та стипендие тивĕçес текенсен документсене конкурс комиссине çитерме (Муркаш, Мир урамĕ, 6 çурт, 226 пÿлĕм. Тел.: 62-0-92) вăхăт пур-ха.
Çĕнтерÿçĕсем паллă
Майăн 18-20-мĕшĕсенче пирĕн районти çамрăк армеецсен юхăмĕн "Зарница" тата "Орленок" отрячĕсен çарпа патриот вăййисем иртрĕç.
Пур конкурс пĕтĕмлетĕвĕпе Москакассинчи вăтам шкулти "Зарница" отряд çĕнтерÿçĕ пулса тăнă. Иккĕмĕш тата виççĕмĕш вырăнсенче - Муркаш шкулĕн тата Мăн Сĕнтĕр шкулĕн вĕренекенĕсен отрячĕсем.
"Орленок" отрячĕсен йышĕнче Муркашри "Родина" çарпа патриот клубĕн отрячĕ малти вырăна йышăннă. Нискасси тата Мăн Сĕнтĕр вăтам шкулĕсен отрячĕсем хыççăнхи вырăнсене тивĕçнĕ.
Экзаменсем пуçланаççĕ
Вунпĕрмĕш класран вĕренсе тухакансем çитес эрнекун, майăн 27-мĕшĕнче, хăйсен пĕрремĕш патшалăх пĕрлехи экзаменне тытаççĕ. Çав кун географи е литература предмечĕсемпе пĕрлехи патшалăх экзаменĕсем иртеççĕ. Пирĕн районти выпускниксем ăна Çĕрпÿре тытаççĕ.
Обязательнăй йĕркепе вырăс чĕлхипе иртекен экзамена июнĕн 30-мĕшĕнче тытĕç. Ку экзамена районти 159 выпускник Муркаш шкулĕнче тытĕ.
Математикăпа, пĕлтĕрхи пекех, патшалăх пĕрлехи экзаменне икĕ меслетпе тытаççĕ: база экзаменне (июнĕн 2-мĕшĕнче) е профиль экзаменне (июнĕн 6-мĕшĕнче). Математикăпа та экзаменсем Муркаш шкулĕнчех пулĕç.
Н. Николаева.