23 апреля 2016 г.
Çуралнă эп чăваш пулса -
Манра чупать чăвашăн юнĕ,
Чĕлхемĕре пит юратса
Унпа пуплетĕп каçăн-ирĕн.
Ман халăхăм епле пуян -
Чăвашăн çĕр-пин юрă-кĕвĕ,
Ташши тĕлĕнмелле аван,
Чĕлхи чĕкеç пек чĕвĕл-чĕвĕл.
Чăваш çынни сăпай, ĕçчен,
Хирте тек ÿстерет сар тулă,
Капмар çуртсем çĕклет куллен,
Мĕнпур ĕçре вăл тăрăшуллă.
Чăвашлăха сума суса
Пурнасчĕ пирĕн ĕмĕр-ĕмĕр.
Пултăр чĕлхи хитре, таса,
Ташши-юррийĕ тĕлĕнтертĕр.
Сăвăри шухăшсемпе эпĕ килĕшетĕп. Эпĕ те чăваш ачи, манăн çывăх çыннăмсем те чăвашсем. Пирĕн çемье чăваш ялĕнче тĕпленнĕ. Мĕн пĕчĕкренех эпĕ чăваш чĕлхипе калаçма вĕреннĕ. Тăван чĕлхем мана питĕ килĕшет. Вăл çемçе те çепĕç, сар кайăк чĕлхи тейĕн. Чăвашсен юррисене те итлеме кăмăллатăп, вĕсем илемлĕ те шухăшлă. Ахальтен каламан ĕнтĕ, юрă вăл халăх пурнăçĕн тĕкĕрĕ тесе. Чăвашсем уявра та, ĕçленĕ чух та, хурлăх пуссан та юрланă, çапла майпа кăмăлне уçнă.
Пирĕн халăх - питĕ ĕçчен тата пуян чун-чĕреллĕ. Вăл çут çанталăка юратать, ăна упрама тăрăшать. Çĕр-аннене сума суса тырă-пулă çитĕнтерет, тĕрлĕ выльăх-чĕрлĕх тытать. Манăн кукамай ĕлĕкхи пурнăç çинчен час-часах аса илет. Чăваш çыннисем ун чухне пĕтĕм ĕçе алă вĕççĕн тунă: тыррине çурлапа вырнă, тумтирне те хăйсемех çыхнă, çĕленĕ, тĕрлесе илемлетнĕ. Кукамайăн та арчара хăй тĕрленĕ япалисем упранаççĕ, вĕсем çинчи тĕрĕ-эрешĕсем, чăнах та, питĕ хитре.
Тĕлĕнмелле халăх вăл - чăваш халăхĕ! Кун-çулĕ тертлĕ те тумхахлă пулнă пулсан та, вăл нихăçан та пуç усман, ĕмĕрсем витĕр хăйĕн йăли-йĕркине, сăвви-юррине, тĕрри-эрешне, пуян чĕлхине упраса хăварма пултарнă. Апла чăвашсем пуян ăс-хакăллă халăх пулса аталаннă. Пирĕн, çамрăксен, çак пуянлăха пĕтме памалла мар, куç шăрçи пек упрамалла, сума сумалла.
М. Павлова,
Тойкилтĕри тĕп шкулта
6 класра вĕренекен.