23 апреля 2016 г.
Пĕрлехи информаци кунне ирттерекен "Раççей Федерацийĕн юстици министерствин федерацин Чăваш Республикинчи суд экспертиза лабораторийĕ" бюджет учрежденийĕн пуçлăхĕ Леонид Морозов ертсе пыракан ушкăн Юнкă ял тăрăхне çитсе килчĕ. Малтанхи калаçу ял тăрăхĕнче иртнĕ хыççăн çак ялти шкул коллективĕпе пулчĕ.
Леонид Петрович кун йĕркипе паллаштарнă май, пĕрремĕш ыйту çинче чарăнчĕ. Вăл каланă тăрăх, республикăра кăна мар, пур çĕрте те 71-мĕш Аслă Çĕнтерĕве тивĕçлĕ шайра кĕтсе илме хатĕрленес ĕçсем пыраççĕ. Çавна май палăксене хăтлăх кĕртмелле тата вĕсем тавра тирпейлемелле. Кашни ялтах ку енĕпе тăрăшмалли пур. Юнкă ял тăрăхĕнче вăрçа хутшăннисене халалласа лартнă палăксемсĕр пуçне ятарлă стелла уçнă. Ку питех те вырăнлă, уйрăмах çамрăксемшĕн, иртнине пĕлме тата асра тытма тивĕç. Тепĕр тĕп самант вăл - Аслă Çĕнтерĕве çывхартма хутшăннисене тимлĕх уйăрасси, тĕрĕссипе вара ку ытти чухне те тивĕçлĕ шайра пурнăçланать. Халĕ вара ку енĕпе ытларах та тимлеме тăрăшмалла, вăл шута вĕсемпе тĕл пулусем ирттересси те кĕрет.
Унсăр пуçне çăвасем çинче тирпейлемеллине те манмалла мар, йывăçсене касса хăтлăх кĕртмелле. Чылай ялти кивĕ çăвасем лаштра йывăçпа хупланма ĕлкĕрнĕ, вăл шутра çак ял тăрăхĕнчисем те. Çавна май кивĕ çăвасем патне пыма май килменнипе манăçа тухасси те инçех мар.
Республикăра ял хуçалăх продукцине туса илесси аталанса пырать. Çак тавара вырнаçтарасси - пĕлтерĕшлĕ ыйту. Республикăра халĕ ял хуçалăх продукцийĕпе суту-илÿ тăвассин "Çуркунне - 2016" уйăхлăх пырать. Леонид Петрович унта май пур таран хутшăнма сĕнчĕ, хамăр туса илнĕ пахалăхлă продукцие сутма май туса пани питех те вырăнлине палăртрĕ.
Пушар хăрушсăрлăхне пăхăнма вĕренесси яланхиллех чи малти вырăна тухать. Районти ку тĕлĕшри лару-тăру çинче пушар хăрушсăрлăхĕн ĕçченĕ Алексей Спиридонов чарăнчĕ. Вăл каланă тăрăх, районта синкерлĕ факт хыççăн тепĕр синкерлĕ факт пулса иртет. Вĕсенче çыннăн пурнăçĕ татăлать, пурлăх кĕлленет. Çавăнпа та тимлĕ пуласси чи малтан хамăртан пуçланмалла, умра çурхи-çуллахи тапхăр тăнине шута илсен пушшех те. Уйрăмах ачасене асăрхамалла, çак тăрăхра çуллахи вăхăтра тухнă пушарсем шăпах та ачасен алхасăвĕпе çыхăннине чылайăшĕ астăвать пулĕ. Вут-çулăмпа асăрхануллă пулнипе танах электропралуксене улăштарасси пирки манмалла мар. Çавăн пекех çак ыйту çинче район администрацийĕн ятарлă программăсен пайĕн ертÿçи Геннадий Любимов тĕплĕн чарăнчĕ. Вăл е ку пурлăха страхлассине те манăçа хăвармалла мар. Район территорийĕнче пурăнакансен 40 проценчĕ кăна хальлĕхе страхланнă. Ку ыйтăва та граждансен тĕпре тытмалла, ун пирки вăл е ку инкек пулсан кăна аса илмелле мар. Çавăн пекех кашни хуçалăхра огнетушитель пулмалла, çакă инкек сарăлассине чакарма май парĕ.
Черетлĕ тĕл пулу "Агрико" чикĕллĕ яваплăхлă обществăра иртрĕ. Унăн ертÿçи Валерий Глушаков малашлăх тĕллевĕсемпе паллаштарчĕ. Каска кăмпи ÿстерессипе тимлекен йыш виçĕ камера хута янă. Пĕр талăкра кашни камерăран çĕршер килограма яхăн хатĕр продукци илеççĕ, тĕрлĕ хулана ăсатаççĕ. Вырăнти халăха ĕçпе тивĕçтерни питех те меллĕ. Ертÿçĕ каланă тăрăх, шалу пĕчĕк мар тата вăхăтра тÿлеççĕ. Продукцие туянас текен йышлă пулнине шута илсе çитес вăхăтра производствăна татах та пысăклатасшăн.
Районти пуçаруллă предпринимательсем вырăнти ĕç-хĕлпе тухса паллашасси, хăйсен сĕнĕвĕсене палăртасси ырă йăлана кĕрсе пырать. Ку хутĕнче тĕл пулăва предпринимательсен канашĕн йышĕнчи Татьяна Бардасова, Маргарита Мигушова, Валентина Кузьмина хутшăнчĕç. Вĕсем вырăнти ĕç-хĕлпе кăсăкланчĕç.
Р. Илларионова.