20 апреля 2016 г.
Ишекенсем ăмăртрĕç
Апрелĕн 16-мĕшĕнче "Сывлăх" спорт шкулĕнче шывра ишессипе район чемпионачĕ иртрĕ. Вăл аслисен тата ачасен ушкăнĕсенче пулчĕ. Çĕнтерÿçĕсене уйрăм ишевсенче çул ÿсĕмне кура палăртнă, командăсен эстафетинче те вăйлисене чысланă.
Шкул командисенчен малти вырăнсене Муркаш, Оринин тата Çатракасси шкулĕсенче вĕренекенсем йышăннă. Вĕсемсĕр пуçне старта Юнкă, Калайкасси, Нискасси, Чуманкасси тата Атапай шкулĕсенче вĕренекенсем те тухнă.
Аслисен категорийĕнче хутшăнакансен йышĕ сахалтарах пулнă: малти вырăна тухассишĕн "Оринино" хуçалăхăн, Оринин, Чуманкасси, Муркаш, Ярославка тата Катькас ял тăрăхĕсен командисем вăй виçнĕ. Пъедестал çинчи чи çÿллĕ картлашка çине чуманкассисем хăпарнă, 2-мĕш тата 3-мĕш вырăнсене муркашсемпе ярославкăсем йышăннă.
Тĕнче шайĕнче
Çулсеренех апрель уйăхĕнче Кстово хулине тĕрлĕ çĕршыври боксерсем пухăнаççĕ. Çĕршывсем хушшинчи çак ăмăртăва Муркаш районĕн команди те кашни çулах хутшăнать. Нумай пулмасть муркашсем унтан пысăк çитĕнÿпе таврăнчĕç.
Ăмăртура 1-мĕш вырăн çĕнсе илсе хăйĕн виçе категорийĕнче Иван Налимов спорт мастерĕн кандидачĕн нормативне пурнăçлама пултарнă. Александр Максимов финалта Раççей хĕç-пăшаллă вăйĕсен турнирĕн çĕнтерÿçипе кĕрешсе 2-мĕш вырăн çĕнсе илнĕ. Олег Николаев (57 кг) тата Максим Долгов (30 кг) кĕмĕл медальсемпе таврăннă. Артем Кожевниковпа Игорь Садовников пĕр кĕрешÿ те выляса ямасăр çĕнтерÿçĕсем пулса тăнă. Хальхи вăхăтра Шалти ĕçсен министерствин Чулхулари академин тата Муркаш район чысне хÿтĕлекен Анатолий Кожевников 3-мĕш вырăн çĕнсе илнĕ.
Хамăр инф.