19 марта 2016 г.
Мартăн 17-мĕшĕнче район администрацийĕнче ветерансен районти канашĕн черетлĕ пленумĕ иртрĕ. Ăна асăннă канаш ертÿçи Ефросиния Куликова уçрĕ тата ертсе пычĕ. Пленума ветерансен ял тăрăхĕсенчи канашĕсен ертÿçисем, активлăхпа уйрăмах палăракан ветерансем, район шайĕнчи ответлă ĕçченсем хутшăнчĕç.
Чи малтанах Ефросиния Сергеевна иртнĕ çулхи ĕç тăрăх отчет турĕ. Ветерансем пуçаруллă пулни унăн докладĕнчен аван курăнчĕ. Тивĕçлĕ канăва тухнă çынсем район аталанăвĕпе тачă çыхăннăран тĕрлĕ производствăпа паллашаççĕ, тирпей-илем кĕртес ĕçе, культура тата спорт мероприятийĕсене активлă хутшăнаççĕ. Çавăн пекех ĕçлĕ çул çÿревпе район тулашĕнче пулаççĕ, çамрăк ăрăва тивĕçлĕ сĕнÿсем параççĕ. Районта 34 пине яхăн çын пурăнать. Пенсионерсен йышĕ 10 пине яхăн, вăл шутран 5 пине яхăн ĕç ветеранĕ, пĕччен пурăнакан ватăсем 400 яхăн.
Иртнĕ çулхи ĕçсем тата малашлăх тĕллевĕ çинчен район администрацийĕн пуçлăхĕ Ростислав Тимофеев тухса калаçрĕ. Район шайĕнче çитес вăхăтра пурнăçламалли ĕçсем çинче чарăнчĕ. Пĕтĕмĕшле илсен, пурнăç малаллах аталанать. Чи пысăк калăпăшлă объект "Сеспель" предприятире тума палăртнă. Ялсенче çул-йĕр тăвасси малалла тăсăлĕ. Вĕренÿ учрежденийĕсенче, спортзалсенче капиталлă юсав ĕçĕсем туса ирттермелле. Нумай ачаллă çемьесене çĕрпе тивĕçтерессипе малалла ĕçлемелле. Ростислав Николаевич ветерансен пуçаруллă ĕçне ырăпа палăртрĕ.
- Малашне те пĕрле килĕштерсе тимлеме ăнăçу, çирĕп сывлăх сунатăп. Сирĕн шухăш-канаш пирĕншĕн яланах вырăнлă, вăл пире кулленхи ĕçре пулăшса пырать, сирĕн ĕçе малашне те ăнăçлă тăсма тăрăшăпăр, - терĕ вăл тав тунă май.
Ĕç çыннин çулталăкĕ пыни питех те пĕлтерĕшлĕ. Кунта пухăннă йыш ĕçпе пиçĕхсе ÿснĕ, ĕç ĕмĕрне те çапла пархатарлă ирттернĕ. Вĕсем пирĕншĕн, çамрăк ăрушăн - тĕп вĕрентекенсем. Çакна шута илсе районта ырă йăла старт илнĕ.
- Ачасене мĕн пĕчĕкрен ĕçе юратма вĕрентмелле, вăл е ку профессипе паллаштармалла. Вĕсемпе шкулсенче тĕл пулусем ирттермелле. Кунта вара ветерансен пулăшăвĕ вырăнлă пуласса шанас килет, - терĕ ветерансене район администрацийĕн пуçлăхĕн çумĕ Лилия Тарасова шкулсемпе тачă çыхăну тытма сĕнсе.
Ветерансем хушшинче кун пек акцие хутшăннисем те пур. Çитес вăхăтра шкул ачисемпе татах та ытларах калаçусем ирттерĕç. Çапла майпа ачасем вăл е ку професси ветеранĕсемпе çывăххăн курса калаçма пултарĕç. Çакă професси суйлассинче, патриотла туйăма аталантарассинче пулăшĕ.
Пленума тĕрлĕ сферăра тăрăшнă сумлă çулхи çынсем пухăннă, çавăнпа та вĕсен ыйту хыççăн ыйту пулчĕ. Ял хуçалăх шăпи те пăшăрхантарать ветерансене. Медицина учрежденийĕсем, вăл шутра ФАП-сем те, вырăнсенче халăх ыйтăвне тивĕçтерни, ытларах пулăшу пани питĕ кирлине палăртаççĕ вĕсем. Муркашсем ав кану валли йывăç сулхăнĕнче пĕр-икĕ тенкел лартса пама ыйтаççĕ. Район центрĕн сăн-сăпатне лайăхлатма унта хăтлăх кĕртме сĕнеççĕ. Вĕсем каланă тăрăх, урамри тасамарлăх, урамри йытă, çуллахи вăхăтра качака-сурăх çине ытларах тимлĕх уйăрни вырăнлă пулмалла.
Муркаш ял тăрăхĕн пуçлăхĕ Сергей Ермолаев район центрĕнче хăтлăх кĕртме пулăшнă ветерансене пĕрлехи ĕçшĕн тав турĕ. Тăрăшнин кăтартăвĕ те курăмлă. ЧР Строительство министерстви 2015 çулхи пĕтĕмлетĕвĕпе "Чăваш Енри чи хăтлă хула тата ял тăрăхĕ" конкурс çĕнтерÿçисене палăртнă, вĕсен йышĕнче Муркаш ял тăрăхĕ те пур.
Калаçу тĕрлĕ енне куçрĕ. "Ÿкессе пĕлнĕ пулсан тÿшек сармалла пулнă", - теççĕ ваттисем. Питех те вырăнлă сăмахсем. Инкек куçа курăнса килмест, район территорийĕнче те синкерлĕ факт сахал мар пулчĕ. Унтан асăрханасси пирки яланах шухăшламалла пирĕн, унпа танах страхласси пирки те. Пурлăха тата ыттине страхлани инкекре пĕччен маррине пĕлтерет. Çакăн пирки "Росгосстрах" страхлакан компанин республикăри филиалĕн районти пайĕн ертÿçи Валерий Вязов тĕплĕн чарăнчĕ.
Сывлăх сыхлав учрежденийĕн ĕçĕ-хĕлĕпе тĕп больницăн тĕп врачĕ Николай Кожевников паллаштарчĕ. Пенси законодательствинчи çĕнĕлĕх çинче Ирина Гришина чарăнчĕ. Граждансене социаллă пулăшу парас мерăсем çинчен Валентина Аникина калани те питĕ кăсăклă пулчĕ. Тухса калаçакансем татах та пулчĕç.
Р. Илларионова.