19 марта 2016 г.
Ветерансене
саламланă
Çак вăхăта районта Аслă Отечественнăй вăрçă участникĕсем 33 çын пурăнать. Вĕсенчен пĕри - Алексей Капитонов çак кунсенче 95 çул тултарнă. Ăна паллă кунпа район администрацийĕн пуçлăхĕ Ростислав Тимофеев саламланă.
Хаяр вăрçă çулĕ Берлина çити илсе çитернĕ Алексей Капитонович паян хăйĕн мăшăрĕпе Анастасия Ефимовнăпа пĕрле федерацин "Ветерансем çинчен" Саккунĕпе килĕшÿллĕн тивĕçнĕ икĕ пÿлĕмлĕ хваттерте Муркашра пурăнать. Капитоновсен 7 мăнук тата 4 кĕçĕн мăнук.
Калайкасси ялĕнчи Александра Горланова та çак кунсенче 95 çул тултарнине паллă тунă. Паллă кунпа тыл ĕçченне район администрацийĕн пуçлăхĕ ячĕпе районти социаллă хÿтлĕх пайĕн пуçлăхĕ Валентна Аникина саламланă, асăнмалăх парне, чечек çыххи панă. Катькас ял тăрăхĕнчи "Ентеш" пултарулăх ушкăнĕ вара ветерана юрă саламĕпе савăнтарнă. Сăмах май, Александра Гавриловна ватлăх çулĕсене пăхмасăрах пурнăçпа тан пыма тăрăшать, район хаçачĕн кашни номернех юратса вулать.
Орининсен -
çĕнĕ пуçлăх
Мартăн 15-мĕшĕнче депутатсен Оринин ял тăрăхĕнчи Пухăвĕн ларăвĕ иртнĕ. Унăн ĕçне район администрацийĕн яваплă ĕçченĕсем, Оринин ял тăрăхĕн пуçлăхĕ пулма çирĕплетме кандидатурăсем суйласа илессипе ĕçлекен комисси членĕсем хутшăннă.
Конкурс комиссийĕ депутатсен Пухăвне виçĕ кандидатурăран Станислав Вячеславович Бардасов кандидатурине сĕннĕ. Депутатсем конкурс комиссийĕн сĕнĕвĕпе килĕшнĕ, С.В. Бардасова Оринин ял тăрăхĕн пуçлăхĕ пулма суйланă.
Терроризм валли çул ан пултăр
Район администрацийĕн пуçлăхĕ Ростислав Тимофеев районти антитеррор комисси ларăвĕнче терроризма тата экстремизма асăрхаттарассипе профилактика мероприятийĕсем туса ирттересси яланах кун йĕркинче пулма тивĕç тесе палăртнă. Унăн ĕçне ЧР гражданла оборона тата чрезвычайлă лару-тăру ĕçĕсен патшалăх комитечĕн председателĕ Вениамин Петров хутшăннă.
Ку тĕлĕшпе районта туса ирттерекен ĕçсем пирки РФ Шалти ĕçсен министерствин районти пайĕн пуçлăхĕн çумĕ Михаил Мясников каласа панă. Ларура çавăн пекех Мăн Сĕнтĕр, Муркаш, Чуманкасси ял тăрăхĕсенче ку ĕçсене мĕнле йĕркеленине тишкернĕ.
Педагогсем канашланă
Калайкасси шкулĕнче районти ача-пăча пултарулăх çурчĕн тата çамрăк техниксен районти станцийĕн хушма вĕренÿ педагогĕсен черетлĕ семинарĕ иртнĕ. Калайкасси шкулĕн директорĕн воспитани енĕпе ĕçлекен çумĕ Э. Портнова семинара хутшăнакансене шкул историйĕпе, шкулти кружоксен ĕçĕ-хĕлĕпе паллаштарнă. Педагогсем "Мазуркин вернисажĕнче", шкулти таврапĕлÿ музейĕнче, Афган вăрçин музейĕнче пулса курнă.
Пĕрремĕш пулăшу пĕлтерĕшлĕ
Районти тĕп больницăра поликлиникăра вăй хуракансен, пĕтĕмĕшле врач практикин офисĕсен врачĕсен, фельдшерпа акушер пункчĕсен фельдшерĕсен вĕренĕвне ирттернĕ. Медицина ĕçченĕсем çынсем производствăра е килте суранланас-аманас пулсан квалификациллĕ пĕрремĕш медицина пулăшăвĕ парассин майĕсене тишкернĕ. Занятие медицина катастрофисен республика центрĕн васкавлă пулăшу уйрăмĕн методист врачĕ Алексей Мочалов ирттернĕ.
Занятире палăртнă тăрăх, пулăшупа вăхăтра тивĕçтерни - яланах пысăк пĕлтерĕшлĕ. Чылай чухне çакă çыннăн пурнăçне сыхласа хăварассипе çыхăннă.
В. ШАПОШНИКОВ хатĕрленĕ.