20 марта 2013 г.
Информаци кунĕ
Паян республикăри кашни районтах пĕрлехи информаци кунĕ иртет. Муркаш енре те ĕç ушкăнĕсем Муркаш, Мăн Сĕнтĕр, Юнкă, Уйкас Янасал ял тăрăхĕсенчи ĕç коллективĕсенче вăй хуракансемпе курса калаçаççĕ.
Пĕрлехи информаци кунĕн тĕп теми – çур акине хатĕрленсе ирттерессинче ĕç тăвакан влаç органĕсем тата вырăнти хăй тытăмлăх органĕсем умĕнчи задачăсем. Кунпа пĕрлех Раççей Федерацийĕнчи пенси тытăмĕн 2030 çулчченхи аталанăвĕ пирки те, коммуналлă услугăсен кăçалхи тарифĕсем пирки те сăмах хускатаççĕ. Информаци кунĕ вăхăтĕнче граждансене йышăнассине те пăхса хунă.
«Шурă ромашка»
Пĕтĕм тĕнчери туберкулеза хирĕç кĕрешмелли куна (мартăн 24-мĕшне) халалланă "Шурă ромашка" акци пирĕн районта та пуçланчĕ. Ăна çулсеренех ирттереççĕ. Акци çынсене туберкулез хăрушă чир пулнине тата ăна тупса палăртассинче флюорографи тĕрĕслевĕ витĕмлĕ пулнине аса илтерет.
Акци апрелĕн 20-мĕшĕччен иртет. Асăннă тапхăрта пурне те Муркашри тĕп больницăра, Мăн Сĕнтĕрти больницăра флюорографи кабинечĕсенче тÿлевсĕр йышăнаççĕ. Унта кашниех çитме тăрăшăр.
Малалла – Шупашкара
Иртнĕ эрнере районти чи пултаруллă та хастар пикесем «Муркаш пики – 2013» конкурсра тупăшрĕç. Конкурса пурĕ çичĕ пике хутшăннă. «Муркаш пики – 2013» ята Муркашри вăтам шкулта вĕренекен Екатерина Козлова тивĕçнĕ. Екатерина мартăн 23-мĕшĕнче иртекен «Чăваш пики – 2013» республика конкурсĕнче Муркаш чысне хÿтĕлĕ.
«Халăх» ятне хÿтĕленĕ
Районти халăх художество пултарулăх коллективĕсем «халăх» ятне хÿтĕлерĕç. Вĕсен ăсталăхне республика шайĕнчи сумлă жюри хакланă. Халăх коллективĕсем куракансем умне тухнă репертуара çĕнĕ постановкăсем те кĕртнĕ. Профессионаллă жюри вара сцена çинчи ăсталăхпа пĕрлех коллективсен тăнăç аталанăвне те тишкернĕ: республикăри фестиваль-конкурссенче мĕнле хутшăннине шута илнĕ. Районти халăх художество пултарулăх коллективĕсем хăйсен ятне чыслăн хÿтĕлеме пултарнă.
Н. Николаева хатĕрленĕ.