28 октября 2015 г.
Иртнĕ кĕçнерникун, юпа уйăхĕн 22-мĕшĕнче, пирĕн районта ĕçлĕ çул-çÿревпе Чăваш Республикин хăй тĕллĕн çÿрекен тата ытти тĕрлĕ машина пăхса тăракан Патшалăх техника надзор инспекцийĕн пуçлăхĕн çумĕ Е. Еландаев пулчĕ. Вăл ял хуçалăх техникине хĕллехи управа лартассине пăхса тăма районта йĕркеленĕ комисси членĕсемпе Чкалов ячĕпе хисепленекен, Суворов ячĕпе хисепленекен, "Ударник" ял хуçалăх производство кооперативĕсемпе В. Горбуновăн хресчен (фермер) хуçалăхĕнче тата "Путь Ильича" агрофирмăра пулса курчĕ.
- Пур çĕре те çитеймерĕмĕр пулин те, Муркаш районĕнчи çĕр ĕçченĕ çуркуннерен хура кĕркуннеччен хирте ĕçленĕ ял хуçалăх техникине нумай вăхăта управа лартассипе, ытти çулсенчи пекех, кăçал та алă усманнине куртăм. Уйрăмах В. Горбуновăн хресчен (фермер) хуçалăхĕнче, Суворов яч. хис. кооперативпа "Путь Ильича" агрофирмăра кăçал ĕçленĕ техника çитес çул та кирлĕ пулнине ăнланни, çĕнĕлĕхсене çул парсах пыни, тирпейлĕх çине çивĕч пăхни куç умне пулчĕ. Чкалов яч. хис. хуçалăхра та паян пĕтĕм вăйпа ял хуçалăх техникине управа лартса пĕтерессипе ĕçлени çĕр ĕçченĕ ыранхи кунпа пурăннине çирĕплетет, - терĕ районти хуçалăхсемпе çаврăнса тухсан хăйĕн пĕтĕмлетÿ сăмахĕнче Евгений Викторович.
Çак кунхи пирĕн рейд Шетмĕпуç ял тăрăхĕнчи Виталий Горбуновăн хресчен (фермер) хуçалăхĕнчен пуçланчĕ. Пытармăпăр, çу каçа ĕçленĕ техникăна кунта паян епле управа лартни нумайăшĕшĕн тĕслĕх те пулма пултарать. Фермер ыранхи куна кĕтсе ларманни кашни утăмрах курăнать. Хресчен (фермер) хуçалăхĕнчи пĕтĕм техникăна çуса тасатса çивиттисем айне управа вырнаçтарнă. Виталий Владимирович техникăна управа лартма йĕтемсемпе тырă аламалли склад-ампарсемпе те туллин усă курать. Çавăнпа та унăн хуçалăхĕнче кăçал туяннă техника та, хăй ăсталанă агрегатсем те шанчăклă хĕл каçса çитес çул татах та тухăçлă ĕçлеме май парасса шанма пулать.
Техникăна управа лартассипе тунă ырă пуçарусене, Шетмĕпуçĕнчи В. Горбуновăн хресчен (фермер) хуçалăхĕнчи пекех, Суворов яч. хис. ял хуçалăх производство кооперативĕнче те тĕл пултăмăр.
- Техникăна йĕркеллĕ управа лартни çитес çулхи уй-хир ĕçĕсен ăнăçăвĕн никĕсĕ пулнине кăçал хамăр тĕслĕхре куртăмăр. Тирпейлĕ упраннă техникăна ĕçе хатĕрлеме те ансатрах, ĕçре те вăл шанчăклăрах. Çакна шута хурса кăçал кĕрхи ĕçсем вĕçленсенех техникăна управа лартассипе ĕçлеме пуçларăмăр. Кăткăсрах техникăна управа лартма паян ятарлă çивитти тăвассипе ĕçлетпĕр. Çывăх кунсенчех çак тĕллеве пурнăçа кĕртме ĕмĕтленетпĕр. Хамăр тимлемесен пире никам та пулăшас çук, - терĕ тирпейлĕ парк территорийĕпе иртнĕ май хуçалăхăн тĕп инженерĕ А. Воробьев (пĕрремĕш сăн ÿкерчĕкре Е. Еландаевпа).
- Техникăна кĕр çитсен нумай вăхăтлăха упрама тирпейлĕ лартни хресчене çур акире тата выльăх апачĕ хатĕрлес тапхăрта ĕçсене вăхăтра та пахалăхлă пурнăçлама пулăшнине пĕлетпĕр. Кунпа пĕрлех энерги перекетлекен техникăпа çĕнĕ технологисем çине куçасси те техникăна çирĕп упрама ыйтать. Çакна ăнланса техникăна управа лартас ĕçе вĕçлесе пыратпăр, - терĕç хăйсене ĕçленĕ вăхăтра тĕл пулсан Чкалов ячĕпе хисепленекен ял хуçалăх производство кооперативĕн ĕçченĕсем пĕр тăван Радиславпа Эдуард Алексеевсем (сăн ÿкерчĕкре сулахайран сылтăмалла).
Çĕнни те кирлĕ, киввине те манас мар - техникăна хĕллехи управа лартассине "Путь Ильича" агрофирмăра çак йĕркепе йĕркеленĕ. Çĕнĕ техника туянасси çине тимлĕх уйăракан хуçалăх вĕсене пĕрремĕш кунранах типтерлĕ упрас тĕлĕшпе те пысăк тимлĕх уйăрать. Хуçалăхăн тĕп инженерĕ Г. Шарапов яра кунах паркран тухманнипе кун йĕркинчи ĕçсем кунта пĕри тепринпе çыхăнса пыраççĕ. Кунти механизаторсемпе юсавçăсем: "Кашни ĕçĕн вăхăчĕ пур", - тесе умри ĕçсене кая хăвармасăр пурнăçлама тăрăшаççĕ. "Çитес çул та çав техникăпах ĕçлемелле-çке", - терĕ тирпейлĕ управа вырнаçтарнă "хир карапĕсем" патĕнчен иртнĕ чух хуçалăх инженерĕ.
Тавралăх хура кĕркуннепе хĕл тĕл пулнă вăхăтра. Умра - чÿк уйăхĕ. Ир-каç çĕр самаях шăнтни, сывлăшра час-часах шурă шăнасем явăнни, кун кĕскелнĕçемĕн кĕскелсе пыни - йăлтах хĕл çывхарăвĕн паллисем.
РЕЙД БРИГАДИ:
С. НИКОЛАЕВ, районти патшалăх техника надзорĕн инспекторĕ;
А. ЕРШОВ, ял хуçалăх управленийĕн эксперт специалисчĕ;
А. БЕЛОВ, район хаçачĕн экономикăпа экологи пайĕн ертÿçи.