28 октября 2015 г.
Совет саманине аса илес пулсан, алă çинчи хĕрлĕ çыхăллă халăх дружинникĕсене час-часах курма май пулнă: тĕрлĕ мероприятире кăна мар, каçхи-çĕрлехи вăхăтра йĕркене сыхланине те. Çакăн пек йĕрке хуралçисен юхăмне чĕртсе тăратассипе юлашки çулсенче пирĕн районта та тĕллевлĕ ĕçсем пулса иртрĕç.
Чăваш Республикин 2014 çулхи декабрĕн 27-мĕшĕнчи "О регулировании отдельных правоотношений, связанных с участием граждан в охране общественного порядка на территории Чувашской Республики" саккунĕпе килĕшÿллĕн Муркаш районĕнчи халăх дружинникĕсен пĕрлешĕвне саккун ыйтнă пек регистрацилерĕç, унăн хăйĕн уставĕ те пур. Çавна май халăх дружинникĕн полномочийĕсене те палăртса çирĕплетнĕ.
Ку таранччен халăх дружинникĕсене районти массăллă мероприятисенче çутă симĕс тĕслĕ жилет тăхăннăран пĕлнĕ пулсан, малашне вĕсене уйăрса илме çăмăлрах пулĕ. Иртнĕ кунсенче вĕсене ятарлă жетонсем тата хĕрлĕ тĕслĕ ал çыххисем пачĕç. Халăх дружинникĕ пулнине çирĕплетекен удостоверени пурри те йĕркене сыхлассинчи пăтăрмахсенчен пăрăнма май парĕ.
Районта, шел пулин те, преступлени тăвасси чакса мар, ÿссе пырать. Эрех-сăра ĕçсе йĕркене пăснă, çакна пулах çемьери хутшăнусем япăхланнă тĕслĕхсем пирки пурте пĕлетпĕр. Çавăнпа та район администрацийĕн пуçлăхĕ Ростислав Тимофеев халăх дружинникĕсем хăйсене шанса панă обществăлла ĕçе тÿрĕ кăмăлпа пурнăçлассинче иккĕленмест. "Чи пĕлтерĕшли - эсир çак ĕçе хăвăр ирĕкпе пурнăçлама шутлани", - терĕ вăл дружинниксене удостоверени парса чысланă май. Малашне вара дружинниксене ĕçлеме лайăхрах майсем тăвас тĕллевпе уйрăм пÿлĕм ыйтăвне татса парассине те палăртрĕ вăл.
Паллах, халăх дружинникĕсен хăйсен полномочийĕсене, апла пулсан саккунсене те лайăх пĕлмелле, кунпа пĕрлех - çынсен тĕрлĕ контингенчĕпе хутшăнма та. Шалти ĕçсен районти пайĕн пуçлăхĕн çумĕ Виталий Григорьев пĕлтернĕ тăрăх, ку тĕлĕшпе ыйту тухса тăмалла мар, мĕншĕн тесен çак йышра - районти чи активлă та тивĕçлĕ çынсем. Хăшĕсем унччен те тĕрлĕ мероприятире йĕркене сыхланă, ял тăрăхĕсенче патрульсем йĕркеленĕ.
Пирĕн районта 32 дружинник, вĕсен хăйсен командирĕ - шалти ĕçсен органĕнче вăй хунă Валерий Яковлев. Вăл обществăлла ĕçе тÿрĕ кăмăлпа пурнăçлама шантарчĕ. Эсир сăн ÿкерчĕкре куракан дружинниксем (сулахайран сылтăмалла) - Муркаш ял тăрăхĕнчи Алексей Слепневпа Андрей Миронов та хăйсен тивĕçне ответлăха туйсах пурнăçлама хатĕррине пĕлтерчĕç.
Çитес вăхăтра халăх дружинникĕсен районти конкурсĕ те иртмелле. Хамăрăн вулакансене ун пирки те пĕлтерĕпĕр.
Н. Николаева.