28 октября 2015 г.
Октябрĕн 23-мĕшĕнче республика Правительство çуртĕнче Раççей Федерацийĕн строительство тата пурăнмалли çурт-йĕрпе коммуналлă хуçалăх министрĕн çумĕ, РФ патшалăх пурăнмалли çурт-йĕр тĕп инспекторĕ Андрей Чибис Раççей Федерацийĕн Президенчĕн çĕршыв гражданĕсене хăтлă та туянма майлă çурт-йĕрпе тивĕçтересси, пурăнмалли çурт-йĕрпе коммуналлă услугăсен пахалăхне ÿстересси пирки йышăннă указне пурнăçа кĕртессин, асăннă сферăна уйрăм çынсен инвестицийĕсене явăçтарассин, çавăн пекех йăла каяшне вырнаçтарассин ыйтăвĕпе округ канашлăвне ирттернĕ.
Канашлура сăмах ытларах коммуналлă хуçалăх сферине инвестицисем явăçтарасси, кунта ĕçлекен бизнеса патшалăх пулăшăвĕпе тивĕçтересси, коммуналлă хуçалăха ăнăçлăрах аталантарассин ытти ыйтăвĕ пирки сăмах пынă. Ку тĕлĕшпе йăла каяшне вырнаçтарассин ыйтăвне татса парасси те пысăк пĕлтерĕшлĕ.
"Эпир Раççей Федерацийĕн субъекчĕсем ЖКХ-на уйрăм çынсен инвестицийĕсене явăçтарма хатĕррин рейтингне ирттертĕмĕр. Чăваш Республики рейтингра виççĕмĕш вырăн йышăнать. Отрасле укçа-тенкĕ хывакансем те çук мар. Шупашкар - пĕтĕм каяша сортламалли ятарлă комплекс витĕр кăларма тытăнакан облаç пĕлтерĕшлĕ пĕрремĕш хула. Çакăн пек ăнăçу тĕслĕхĕсем çĕршыври кашни регионăн пулма тивĕç", - палăртнă Андрей Чибис хăйĕн сăмахĕнче.
Михаил Игнатьев çавăн пирки чарăнса тăнă. "Каяш сортламалли комплекс тума республикăра 614 млн тенкĕ явăçтарнă. Килĕшÿ туса концессионер 950 млн тенкĕ хывнă, татах та çĕршер млн тенкĕ хывĕ. Объекта хута янă ĕнтĕ. Халĕ республикăра пурăнакансенчен çуррине ытла каяш ыйтăвĕ канăçсăрлантармалла мар. Ытти ял тата хула округĕсенче каяш тиесе ăсатмалли пунктсем пулĕç. Эпĕ каяш ыйтăвне çитес виçĕ çул хушшинче пĕтĕмпех татса пама тĕллев лартатăп",- тенĕ вăл.