28 октября 2015 г.
Çын ĕçпе кăна пурăнаймасть, ăна чун апачĕ те кирлĕ. Тĕрлĕ информацие вара эпир хаçат-журнал, "сенкер экран", радио урлă пĕлме пултаратпăр. Пире, аслăрах çулхисене, уйрăмах хаçат-журнал çывăх. Халĕ вара шăпах çырăнтару тапхăрĕ пырать. Ку енĕпе ĕç епле пынипе паллашма эпĕ Йÿçкассинчи çыхăну уйрăмне çул тытрăм. Кунта ăшă кăмăллă çынсем ĕçлеççĕ, мана тарават кĕтсе илчĕç. Çакăнти ĕç-хĕле йĕркелесе пыраканĕ вара - тăрăшуллă Эльза Алексеева. Ертÿçĕре вăл вунă çул ытла тимлет. Çавăн пекех çак уйрăмра пилĕк почтальон тăрăшать. Хăш почтальонĕ лайăхрах ĕçленипе кăсăклантăм. Эльза Изосимовна каланă тăрăх, пурте тăрăшса ĕçлеççĕ, çырăнтаракан патне хаçат-журнал вăхăтра çитерессипе лайăх тимлеççĕ. Пур издани те хăйне майлă кăсăклă, çапах та ку тăрăхра районта тухса тăракан "Çĕнтерÿ ялавĕ" хаçата ытларах кăмăлланине пĕлтĕм. Кăçал 300 ытла экземпляр илсе тăраççĕ. Халĕ вара çитес çур çул валли çырăнтараççĕ.
Почтальон ĕçĕ вара çăмăл мар. Çумăр çăвать-и, çил-тăманлă çанталăк-и - вĕсен хаçат-журнала вулакан патне вăхăтра çитермелле. Панкли тăрăхĕнче малтан 2 почтальон пулнă, каярах вара 1 çынна кăна хăварчĕç. Лена Моисеева çакăнта ĕçлеме килĕшрĕ. Шаннă ĕçре вăл тăрăшса тимлет. Вулакан патне хаçат-журнала пĕр тăхтамасăр çитерет.
Эпĕ вара "Çĕнтерÿ ялавĕ" хаçатпа тачă çыхăну тытатăп. Унта çырнисĕр пуçне кашни статьяна тимлĕн юратса вулатăп. Вăл район тата республика хыпарĕсемпе тĕплĕн паллаштарать. Тивĕçлĕ канăва тухнă çынсем пирки те тăтăшах çыраççĕ. Эрнере икĕ хутчен тухнипе вуламалăх пур. Эсир те çак хаçата çырăнмасăр ан юлăр. Унта хăвăр шухăшсене, ыйтăвăрсене çырса пĕлтерĕр.
И. Яковлев.