31 октября 2015 г.
РФ Пенси фончĕн Муркаш районĕнчи пайĕ федераци çăмăллăхĕсемпе усă куракансенчен соцпакетпа епле майпа усă курасси пирки заявленисем йышăнса пĕтерчĕ. Районĕпе федераци çăмăллăхĕсемпе 3002 çын усă курать. Вĕсенчен 4,4 проценчĕ 2015 çулта çитес çул социаллă услугăсем вырăнне укçа тÿлевĕ илме тытăнма заявлени çырса пачĕ.
Çăмăллăхсемпе усă куракансенчен ытларах пайĕ 2016 çулта соцпакетпа мĕнле майпа усă курасси пирки заявлени пачах çырман. Çапла вара вĕсен патшалăх пулăшăвĕпе усă курассин майĕ унччен суйласа илнĕ пекех сыхланса юлчĕ. Заявлени çырса панисенчен ытларахăшĕ - федераци çăмăллăхĕсемпе усă кураканăн статусне иртнĕ çул вĕçĕнче тата 2015 çулта тивĕçнисем. Мĕншĕн тесен пĕрремĕш хут соцпакет пама пуçăннă чухне ăна çăмăллăхсемпе тивĕçтересси енĕпе пăхса хунă.
Саккунпа пăхнă октябрĕн 1-мĕшĕ тĕлне Муркаш районĕнче соцпакет кирлĕ марри пирки 131 заявлени йышăннă, 28 заявлени - çăмăллăхсемпе усă курма пуçăнасси пирки.
Социаллă çăмăллăхсен пухмачĕ (соцпакет) виçĕ пайран тăрать: эмел, санаторипе курорт тата транспорт пайĕсенчен. Соцпакетпа туллин те, çавăн пекех кашнинпе уйрăм та усă курма пулать.
Соцпакетăн пĕтĕмĕшле тулли виçи хальхи вăхăтра уйăхне 930 тенкĕ те 12 пуспа танлашать. Çав шутра эмелпе тÿлевсĕр тивĕçтерессин пайĕ - 716 тенкĕ те 40 пус, тухтăр сĕннипе санаторие кайма путевкăпа тивĕçтерессин санаторипе курорт пайĕ - 110 тенкĕ те 83 пус, транспорт пайĕ (хула тулашĕнчи пуйăссемпе тÿлевсĕр çÿресси, санаторие кайса килесси) - 102 тенкĕ те 89 пус.
Аса илтеретпĕр. Федераци çăмăллăхĕсемпе усă куракансен шутне Аслă Отечественнăй вăрçă участникĕсемпе инваличĕсем, çар операцийĕсене хутшăннă ветерансем, вăрçă ветеранĕсен тăлăх мăшăрĕсем, радиаци катастрофисене пула шар курнă граждансем кĕреççĕ.