31 октября 2015 г.
Агропромышленность комплексне аталантарассипе çĕнĕлĕхсем тăтăш пурнăçа кĕрсе пынă вăхăтра ял хуçалăх техникипе перекетлĕ те тирпейлĕ пуласси кашни çĕр ĕçченĕшĕн тĕп тĕллев пулса тăчĕ. Çакна ăнланакан паянхи пурнăçра хăватлă ял хуçалăх техникипе ĕçлесе çеç аталанăвăн çĕнĕ чиккисене çĕнсе пырать. Апла пулсан ĕçленĕ техникăна упрасси çине тимлĕрех пăхасси те - хресчен ĕçĕнче малти вырăнта.
Район администрацийĕн пуçлăхĕн йышăнăвĕпе ял хуçалăх техникине хĕллехи управа лартассипе ирттернĕ смотр-конкурс кăçал çăмăл мар лару-тăрура иртрĕ. Апла пулсан та хуçалăхсенче техникăна хĕллехи управа лартассипе ытти çулхисенчен тĕллевлĕрех ĕçлени курăнчĕ.
Пĕтĕмлетÿре комисси членĕсем "Путь Ильича" агрофирма механизаторĕсемпе юсавçисем ыттисенчен хастартарах пулнине, вĕсем ГОСТ ыйтăвĕсене туллин пурнăçланине, техника ĕмĕрĕ çине хуçалларах пăхнине палăртрĕç.
Юлашки çулсенче Суворов яч. хис. ял хуçалăх производство кооперативĕ те техникăна управа лартассипе тĕллевлĕрех ĕçлеме пуçлани курăнать.
- Паян хуçалăхра усă куракан техника - механизаторсене тивĕçлĕ ĕç укçи ĕçлесе илме пулăшакан механизм. Çакна пирĕн ĕçченсем ăнланаççĕ. Çавăнпах хăйсем çу каçа ĕçленĕ техникăна хĕллехи управа лартасси те вĕсен ĕçĕн уйрăлми пайĕ пулса тăчĕ. Техникăна упрасси çине хамăр енчен те тимлĕх çухатмастпăр. Çак кунсенче машинăпа трактор паркĕнче техникăна управа лартма ятарлă çивиттиллĕ вырăн хатĕрлетпĕр: техника унта хĕл каçĕ, - терĕ пире хуçалăхăн тĕп инженерĕ А. Воробьев.
Çапла вара хирте ĕçленĕ ял хуçалăх техникине хĕллехи управа лартассипе йĕркеленĕ районти смотр-конкурсра кăçал "Путь Ильича" агрофирма - пĕрремĕш вырăн, Суворов яч. хис. хуçалăх - иккĕмĕш вырăн, В. Горбуновăн хресчен (фермер) хуçалăхĕ виççĕмĕш вырăн йышăнчĕç. Вĕсем район администрацийĕн 1, 2, 3 степеньлĕ дипломĕсене тата 3000, 2000, 1000 тенкĕ укçан премие тивĕçрĕç.
С. НИКОЛАЕВ,
патшалăх техника надзорĕн районти инспекторĕ*
А. БЕЛОВ,
район хаçачĕн ял хуçалăх пайĕн ертÿçи.