13 марта 2013 г.
Отчетпа суйлав пухăвĕсем пуçланчĕç
Районти пĕрлешÿллĕ хуçалăхсенче отчетпа суйлав пухăвĕсен тапхăрĕ пуçланчĕ.
Пĕрремĕш пуху мартăн 7-мĕшĕнче «Герой» хуçалăхра иртнĕ. Пухăва хутшăнса район администрацийĕн пуçлăхĕ Р. Тимофеев районăн социаллă тата экономика аталанăвĕ пирки каласа панă, пурнăçлама палăртнă ĕçсем çинче кĕскен чарăнса тăнă.
Иртнĕ çулхи ĕç кăтартăвĕсемпе хуçалăх ертÿçи Г. Иванова паллаштарнă. Вăл иртсе кайнă çул хуçалăхшăн çăмăл килменнине палăртнă. Хуçалăхри ытти специалистсем те тухса калаçнă. Пуху хуçалăха малашне те Г. Ивановăна ертсе пыма шаннă.
«Муркаш пики – 2013»
Çак ятпа иртекен конкурс районта ырă йăлана кĕчĕ ĕнтĕ. Кăçал ăна мартăн 15-мĕшĕнче ирттерме палăртнă. Унта 17–25 çулхи хĕрсем хутшăнма пултараççĕ. Вĕсем чăвашла илемлĕ те йĕркеллĕ калаçнине, тăван ен культурипе историне пĕлнине тата ытти енлĕ пултарулăхне сумлă жюри хаклĕ.
Çĕнтерÿçĕ пике «Муркаш пики – 2013» ята, 2-мĕш вырăна тухни – «Вице-Муркаш пики – 2013» пулма тивĕçеççĕ. Кунсăр пуçне конкурса хутшăнакансен тата тăватă номинацирен пĕринче çĕнтерÿçĕ пулма та май пур.
Конкурс финалĕ иртрĕ
Шкулсенчи аслă вожатăйсен тата директорăн воспитани енĕпе ĕçлекен çумĕсен районти «Воспитать человека – 2013» конкурс финалĕ иртнĕ. Финалта çичĕ çын хăйĕн пултарулăхĕпе, ĕçри опычĕпе тата педагог ăсталăхĕпе паллаштарнă.
Район конкурсĕн çĕнтерÿçи пулма Калайкассинчи вăтам шкулта директорăн воспитани енĕпе ĕçлекен çумĕ Александр Степанов тивĕçнĕ. Ытти ултă педагога тĕрлĕ номинацисенче палăртса чысланă.
Район администрацийĕн пуçлăхĕн кубокне çĕнсе илме
Шăмат кун, мартăн 16-мĕшĕнче, йăлана кĕнĕ тăрăх район администрацийĕн пуçлăхĕн кубокне çĕнсе илессишĕн спорт ăмăртăвĕ иртет. Унта районти хуçалăхсемпе предприятисен, организацисемпе учрежденисен, район администрацийĕн пайĕсен, учительсен тата ял тăрăхĕсен командисем йĕлтĕр йĕрĕ çинче эстафетăра вăй виçĕç.
Ăмăртăва ирттерессипе район администрацийĕ ятарлă йышăну тунă. Ĕнер йĕркелÿ комитечĕ канашларĕ, ответлă ĕçченсем ăмăртăва ирттерме хатĕррине пĕлтерчĕç.
Н. Николаева хатĕрленĕ.