07 марта 2013 г.
Муркашра иртнĕ республика шайĕнчи бокс ăмăртăвĕ виçĕ куна пычĕ. 135-е яхăн боксер «Сывлăх» физкультурăпа спорт комплексĕнчи ринг çинче вăй виçрĕ. Чулхуларан, Лысково, Кстово, Саранск, Йошкар-Ола, Санкт-Петербург хулисенчен пухăнчĕç боксерсем. Шупашкар, Çĕнĕ Шупашкар, Çĕмĕрле, Канаш, Çĕрпÿ хулисенчи, Красноармейски, Элĕк, Шупашкар тата, паллах, Муркаш районĕсен спортсменĕсем хаваспах ăмăртăва хутшăнчĕç.
Районта спорта аталантарассипе чылай ĕç пурнăçлани палăрать, спорт ăмăртăвĕсен календарĕнче те çĕннисем хушăнаççĕ. Акă иртнĕ эрнере Совет çарĕсене Афганистанран кăларнине асăнса, интернационалист-салтаксене халалласа Муркаш район администрацийĕн пуçлăхĕн кубокне çĕнсе илессишĕн Муркашра республикăн уçă ăмăртăвĕ пĕрремĕш хут иртрĕ. Истори страницисене тишкерсен çав сăртлă-туллă çĕр-шыври вăрçă пирĕн районти 144 салтака, апла пулсан тата ытларах çемьене тÿррĕнех пырса тивнĕ. Шел пулин те, 7 салтак киле таврăнайман. «Вĕсене эпир нихăçан та манас çук. Хăйсен çар тивĕçне чыслăн пурнăçланă интернационалист-салтаксене халалланă спорт ăмăртăвĕ те тивĕçлĕ спортсменсене малалла çул уçса парасса шанас килет. Пирĕн районтан тухнă боксерсем те тен тĕнчипех паллă пулĕç», – çакна палăртса район администрацийĕн пуçлăхĕ Ростислав Тимофеев ăмăртăва уçрĕ.
Кăвак беретлă «афганецсем», шурă кĕпепе хура «лĕпĕшлĕ» судьясем ăмăртăвăн чаплăхне те, сумлăхне те ытларах палăртрĕç. Шупашкарти агрегат заводĕнчи «афганецсен» пĕрле-шĕвĕ акă ятарлă кубок çирĕплетнĕ. Пирĕн районти интернационалист-салтаксен пĕрлешĕвне ертсе пыракан В. Киршев çитĕнекен ăрăва патриотла воспитани парассинче палăрнисене Хисеп грамотисем, медальсем парса чысларĕ.
Иртнĕ кĕçнерни кун бокс ăмăртăвне пуçарса ячĕç тесен те тĕрĕс пулать пулĕ. Малашне те бокс ăмăртăвне çулсеренех кунта ирттерме палăртрĕç. Мĕншĕн тесен ăмăртăва килнĕ сумлă спортсменсем, хăнасем пурте Муркаш ăна ирттерме тивĕçлĕ пулнине пĕлтер-чĕç. Ăмăртăвăн тĕп судйи, бокс енĕпе тĕнче чемпионĕ Валерий Львов: «Ăмăрту малашне те Муркашрах ирттĕр. Пирĕн кунта килме кăмăл пысăк», – тени те çавнах çирĕплетрĕ. Чăнах та ăмăртăва, пĕрремĕш хут пулин те, çÿллĕ шайра ирттерме пултарчĕç.
Ăмăртăвăн пĕрремĕш кунĕнчи пĕрремĕш кĕрешÿре Муркаш боксерĕ Игорь Быков çĕнтерни вара хăйне май лайăх паллă пулчĕ. Кайранхи кĕрешÿсенче, виçĕ кунĕнче те, пирĕн яшсем техника енĕпе те, кĕрешÿсен пахалăхĕпе те палăрчĕç. Финалти кĕрешÿсем çакна лайăх кăтартса пачĕç. Иван Налимов чи кĕске вăхăта пынă кĕрешÿпе палăрса, «Чи лайăх боксер» ят илсе кубока тивĕçрĕ. Родион Музыковăн çĕнтерес кăмăлĕ питĕ пысăк пулнине палăртса ăна та ятарлă кубок парса хавхалантарчĕç. Александр Никитин тата Николай Багдасарян боксерсен финалти кĕрешĕвĕ куракансене тыткăнлани залта шăплăх хуçаланнинчен те, кашниех тимлесе, пĕр çеккунтлăх та рингран куç вĕçертменнинчен те курăнчĕ. Кĕрешÿре хальхи вăхăтра Санкт-Петербург хулинче ăсталăха туптакан Александр Никитин çĕн-терчĕ. «Ăстасен кĕрешĕвĕ пулчĕ, питĕ пахалăхлă, – çапла хак пачĕ Ростислав Тимофеев ăмăрту вĕçленнĕ май. – Çакăн пек кĕрешÿсене курса спортпа тата та ытларах çамрăк туслашасса шанса тăратпăр», – тесе пĕтĕмлетрĕ вăл район администрацийĕн пуçлăхĕн кубокне Муркаш районĕн команди çĕнсе илнине пĕлтерсе.
Кубок «килте» юлнинче вара Сергей Васильевич Черкашин, Олег Артурович Сютруков тата Сергей Сергеевич Черкашин тренерсен тÿпи пысăк. Ăмăртăва ирттерме пулăшакансем те сахал мар пулчĕç (вĕсене район администрацийĕн Тав çырăвĕсемпе палăртрĕç). Апла пулсан Муркаш тăрăхĕнче спорт хăйĕн пĕлтерĕшне çухатмастех.