02 марта 2013 г.
«Росгосстрахăн» куçса çÿрекен кубокне çĕнсе илессишĕн иртекен ăмăрту илемлĕ юрă-кĕвĕрен пуçланчĕ. «Росгосстрах» пĕрлешĕвĕн Чăваш Республикинчи филиалĕн пирĕн районти уйрăмăн ĕçченĕсенчен тăракан пултарулăх коллективĕ çапла майпа пĕрремĕш хут халăх умне тухрĕ. Юрă-кĕвĕрен пуçланнă уяв вара вĕçне çитичченех пĕр тикĕс иртрĕ.
Кăçалхипе çак ăмăрту çиччĕмĕш хут пулчĕ. Яланхи пекех ăмăртăва вăйлă командăсем пухăннă, анчах та унăн пĕр çĕнĕлĕх, пĕлтерĕшлĕ енĕ пулчĕ – республика шайĕнчи ăмăрту регион шайне хăпарчĕ. Тăван çĕр-шыв хÿтĕлевçисен кунĕнче çак ăмăртура вăй виçме Йошкар-Ола, Козьмодемьянск, Хусан, Шупашкар хулисенчи командăсем те килсе çитнине хаçат вулакансене пĕлтернĕччĕ ĕнтĕ. Пирĕн районти командăсемпе пĕрле пурĕ 12 команда вăй виçрĕ.
«Росгосстрахăн» пирĕн районти уйрăмĕ республикăра чи лайăххисен шутĕнчине палăртса ăмăртăва А. Пирожков уçрĕ. Республика, район шайĕнчи чылай ертÿçĕсенчен, паллах уйрăма ертсе пыракан В. Вязовран салам сăмахĕсем илтме спортсменсем кăмăллă пулни палăрчĕ. Çулсеренех ăмăртăва ирттерме пулăшакансене вара парне парса та хавхалантарчĕç.
Чăн-чăн арçынсен уявĕнче – Тăван çĕр-шыва хÿтĕлекен кунĕнче Муркашри Çĕнтерÿ паркĕнчи палăк умне чечек хурса пирĕн пурнăçшăн пуç хунисене аса илчĕç, вĕсем умĕнче пуç тайрĕç .
Спортзалсенче вара питĕ хĕрÿ вăйăсем пулчĕç. «Пирĕн районта çулталăк хушшинче 20 ытла волейбол ăмăртăвĕ иртет пулсан ку ăмăрту чи паха вăйăсемпе палăрса тăрать», – тесе районти волейбол федерацийĕн ертÿçи В. Калинин калани питĕ тĕрĕс. «Росгосстрахăн» кубокне çĕнсе илес текенсем – пысăк профессионалсем. Çавăнпах вăйăсене сăнаса чăнах та киленме пулать. Начар вылякансем çук. Анчах та «Рэмисс» командăна çитекенни пулмарĕ. Пирĕн районти «Передовик» команда иккĕмĕш вырăна тухма пултарни вара нумайăшĕшĕн çитес çул ăмăртăва килсе курмалли хистев вырăннех пулчĕ.
Н. Николаева.