27 февраля 2013 г.
терĕ «Çĕр улми – 2013» выставкăра тĕл пулсан «ВаСем» чикĕллĕ яваплăхлă общество ертÿçи В. Кондратьев.
Ял хуçалăх аталанăвĕ пĕр вырăнта тăмасть. Çĕнĕлĕхсене алла илекенсем тăтăшах шыравра. Çакна Чăваш Республикин Ял хуçалăх министерствипе «Агро-Инноваци» унитарлă предприяти, Раççей ял хуçалăх академийĕн çĕр улмипе ĕçлекен А. Лорх ячĕллĕ наукăпа тĕпчев институчĕ йĕркеленĕ «Çĕр улми – 2013» выставка-ярмăрккă та çирĕплетрĕ. Çак курав хула çыннисемшĕн те, ялта пурăнса килти хушма хуçалăх аталантаракансемшĕн те, çĕр улми туса илессипе тимлекен ял хуçалăх предприятийĕсемшĕн те усăллă пулни выставкăра пулсан кашни утăмрах курăнчĕ. Пысăк тухăç шантаракан вун-вун сорт, çĕр улми лартса-туса илессипе тухăçлă ĕçлеме паянхи кун ыйтакан энерги перекетлекен техника, «иккĕмĕш çăкăра» тирпейлĕ упрама пулăшакан технологи çĕр улми туса илес наука пĕр вырăнта тăманнине çирĕплетеççĕ. Çакăн пирки çĕнĕлĕхсем патĕнче хĕвĕшекен специалистсемпе ял-хула çыннисем çĕр улми туса илес ĕçри вăрттăнлăхсемпе çине тăрса паллашни курăмлă калаççĕ.
Асăннă выставкăна пирĕн районти хуçалăхсем те хутшăнмасăр юлмарĕç. Çĕр улми туса илекен ăстасен ретĕнче çак кунсенче «Ударник» сăнавлă производство хуçалăхăн çĕр улми вăрлăхĕ туса илессипе ĕçлекен лаборатори тата «ВаСем» чикĕллĕ яваплăхлă общество ĕçченĕсене те курма май килчĕ.
– Выставка-ярмăрккăна пĕр енлĕ ирттерменни унăн йĕркелÿçисем ума лартнă ыйту çине тĕплĕ пăхни пирки калать. Çĕр улмин 100 ытла сорчĕ, вĕсене туса илмелли вуншар техника единици кашниех хăйĕн патĕнче чарăнса тăма ыйтать. Çĕр ĕçне чунĕпе парăннă хресчене çиччĕ виçсе пăхмалли кунта темĕн чухлех. Выставка шайĕнче «Чăваш Республикин тĕслĕхĕпе çĕр улми эффективлă туса илмелли аталану мелĕсем» наукăпа практика конференцийĕ ирттернине ырламалла кăна. Çавăн пекех «Çĕр улми туса илес ĕçри сорт ресурсĕсем: инноваци, конкурентлăх, пахалăх стандарчĕсем», «Пысăк тухăç валли çĕр улмине шăварасси тата апатлантарасси», «Çĕр улми маркетингĕ», «Хăй ĕçне пуçăнакан фермер валли» çавра сĕтелсем ирттерни çĕр улми туса илессипе тĕллевлĕ ĕçлекенсемшĕн пысăк пĕлтерĕшлĕ пулчĕ. Эпир çакăнтан пĕр пайне пурнăçа кĕртсессĕн те хуçалăх экономики тепĕр утăм малалла тăвасси пирки пирĕн иккĕленÿ çук, – терĕ Валерий Семенович çывăхра вырнаçтарнă çĕр улми сортламалли агрегат çинчен куçне илмесĕр. Кунта çакна каласа хăвармалла. 2013 – 2020 çулсем валли ял хуçалăх продукцийĕн, чĕртаварпа апат-çимĕç рынокне патшалăх шайĕнче йĕркелесе пыма пăхаççĕ. Çакна валли патшалăх ял хуçалăх таварĕ туса кăларакан предприятисене, ялсенчи пĕчĕк харпăрлăх формиллĕ хуçалăхсене çĕнĕ пулăшу формисем пăхать. Вĕсенчен пĕлтерĕшлĕреххи – çĕр ĕçченне паянхи кун ыйтакан техникăпа, оборудованипе, çĕнĕ технологипе çителĕклĕ тивĕçтересси.
Çапла. Çĕнĕлĕхсем, малашлăха пăхса пурнăçа кĕртнĕ техника хатĕрĕсем кунта туллиех. Çавăнпах-тăр выставкăна хутшăнакансем те Раççей Федерацийĕн кашни кĕтесĕнченех. Официаллă йĕркепе вĕсем хушшинче хамăр çĕр-шыври 31 регион делегацийĕ пур. Беларуç Республикипе Казахстанран, Германипе Америкăри Пĕрлешÿллĕ Штатсенчен килнĕ ĕçлĕ çынсем те – Чăваш Республикинче иртекен выставка-ярмăрккă илемĕ.
Выставкăпа юнашар çуртра вăрлăх çĕр улми, вăрлăх сухан, пахча çимĕç сутассине йĕркелени – уявăн тулли илемĕ. Выставка-ярмăрккăра Йÿçкассисем 10 тоннăна яхăн, «ВаСем» чикĕллĕ яваплăхлă общество 7,5 тонна çĕр улми вăрлăхĕ сутма пултарнă.
Хĕл вĕçленсе пынă май çурхи ака-сухаччен те инçех юлмасть. Çакна шута илсен «Çĕр улми – 2013» выставкăра çĕнĕ вăрлăх туяннисем е ăна валли килĕшÿ йĕркеленисем çур акине хатĕрленсе пĕрремĕш утăм турĕç тесе шутлама майĕ пур.
А. БЕЛОВ.