27 апреля 2015 г.
Иртнĕ кĕçнерникун районти Культура çуртĕнче Вырăнти хăй тытăмлăх кунне паллă турĕç. Савăнăçлă пухăва муниципалитет ĕçченĕсем, çак сферăра вăй хунă ветерансем, депутатсен районти Пухăвĕн, ял тăрăхĕсен Пухăвĕсен депутачĕсем, ял старостисем, ертÿçĕсем хутшăнчĕç.
Район администрацийĕн пуçлăхĕ Ростислав Тимофеев хăйĕн сăмахĕнче муниципалитет влаçĕ халăха чи çывăх влаç тытăмĕ пулнине палăртрĕ. Паян вырăнти влаç органĕсенче 102 çын ĕçлет. Вĕсемпе пĕрлех район малашлăхĕшĕн депутатсен районти Пухăвĕн 25 депутачĕ, ял тăрăхĕсен 185 депутачĕ, 200 яхăн ял старости вă хурать.
Пĕрне-пĕри ăнланса ĕçлесен çитĕнÿсем те кĕттермеççĕ. Обществăлла финанссемпе ĕçлессипе 2013 çул пĕтĕмлетĕвĕпе Муркаш районĕ республикăри муниципалитет йĕркеленĕвĕсем хушшинче 2-мĕш пулчĕ. «Бюджет тăкакĕсене пысăк пахалăхпа йĕркелесе пырасси» номинацире Пĕтĕм Раççей конкурсĕнче 1-мĕш вырăн çĕнсе илчĕ. Инвестицисене активлă явăçтарнин рейтингĕнче республикăри муниципалитетсем хушшинче район 2-мĕш вырăн йышăнчĕ. Республикăри муниципалитетсем хушшинче энергие перекетлессипе çĕнтерÿçĕ ята тивĕçрĕ. Районти 7 ял хуçалăх предприятийĕ республикăри чи лайăх 100 ял хуçалăх предприятийĕ йышне кĕме пултарчĕ. Район туризма аталантарассипе федераци программине кĕчĕ.
Тепĕр ырă хыпар та çитрĕ. Финанссемпе ĕçлессипе 2014 çул пĕтĕмлетĕвĕпе пирĕн район республикăри муниципалитетсем хушшинче 2-мĕш вырăна тухрĕ.
Вырăнти хăй тытăмлăх кунĕ ячĕпе пухăннисене депутатсен районти Пухăвĕн председателĕн çумĕ Валерий Вязов саламларĕ.
Чăваш Республикин Патшалăх Канашĕн депутачĕсем Николай Ванеркинпа Владимир Мидуков район ăнăçусен çулĕпе малалла утасса шаннине пĕлтерчĕç.
Вырăнти хăй тытăмлăх органĕсенче нумай çул ĕçленисем, тăрăшулăхпа палăрнисем Хисеп грамотисене тивĕçрĕç.
Хамăр инф.