18 апреля 2015 г.
Кĕçнерни кун районти ветерансен канашĕн, агропромышленноç комплексĕнчи ветерансен канашĕн тата Раççей пенсионерсен союзĕн уйрăмĕн районти канашĕн пĕрлехи ларăвĕ иртнĕ.
Унта тĕпрен илсен Аслă Çĕнтерÿ уявне тивĕçлĕ кĕтсе илес ыйтусене сÿтсе явнă.
Район администрацийĕн пуçлăхĕ Р.Н. Тимофеев район экономикипе социаллă пурнăç аталанăвĕ çинче чарăнса тăнă. Аслă ăру çыннисем мирлĕ пурнăç парнеленине палăртса тав тунă. Ветерансем паянхи çамрăксемшĕн ырă тĕслĕх пулнине палăртнă.
-Районта ветерансен пурнăç условийĕсене лайăхлатассипе куллен ĕçлетпĕр. 255 ветерана çурт-йĕр çĕнетме пулăшрăмăр,- тенĕ вăл.
Аслă Çĕнтерÿ 70 çул тултарнă ятпа тĕрлĕ мероприятисем иртеççĕ. Палăксене юсаса çĕнетеççĕ. Фронтовиксемпе тыл ĕçченĕсене юбилей медалĕсем парса чыслаççĕ. Уяв ячĕпе кашни ял тăрăхĕнчех митингсем ирттереççĕ. Кун пирки район администрацийĕн пуçлăхĕн çумĕ Л.Ю. Тарасова каласа панă.
Аслă Çĕнтерÿ уявне тивĕçлипе уявласси пирки районти ветерансен канашĕн ертÿçи Е.С. Куликова, агропромышленноç комплексĕнчи ветерансен канашĕн ертÿçи В.И. Вязов тата Раççей пенсионерсен союзĕн уйрăмĕн районти канашĕн ертÿçи А.П. Скворцов каланă, сĕнÿсем панă.
Хамăр инф.