08 апреля 2015 г.
Аслă Çĕнтерÿ юбилейĕ çитсе килет. Çав хăрушă вăрçă çулĕсем пирĕнтен аяккарах та аяккарах юлса пыраççĕ. Вăрçă ветеранĕсен речĕ вара сайраланнăçемĕн сайраланать. Анчах та вăрçă çулĕсенчи ăру çыннисем пирки астăвăм нихăçан та манăçмĕ. Çавна шута илсе 2015 çулхи апрелĕн 1-мĕшĕнчен тытăнса Чăваш Ен электрон тата кино документацийĕн патшалăх архивĕ "Ĕмĕр упрар" ("Хранить Вечно") проекта пурнăçа кĕртме пуçларĕ. Ăна Аслă Отечественнăй вăрçăра Çĕнтерÿ тунăранпа 70 çул çитнине халалланă.
Пирĕн архив Чăваш Ен историйĕ çинчен каласа паракан фото-, фоно-, кино- тата видеодокументсене типтерлĕ упрать. Уйрăмах Аслă Отечественнăй вăрçă çулĕсемпе çыхăннă электрон фотодокументсем пысăк пахалăхлă шутланаççĕ. Архив йĕркеленме тытăннă чухнех вăрçă ветеранĕсен харпăр хăй коллекцийĕсем кун çути курма пуçларĕç. Ку енĕпе ĕçсем пĕр кунлăха та чарăнмаççĕ.
"Ĕмĕр упрар" проекта Аслă Отечественнăй вăрçă участникĕсемпе тыл ĕçченĕсен харпăр хăйсен тата çемье архивĕсенчи докуменчĕсене пухас, упрас тата вĕсем пирки çырса кăтартас тĕллевпе йĕркеленĕ. Архив асăннă акцие республикăри хăйсен çемье, çĕршыв историйĕ пĕлтерĕшлĕ тесе шухăшлакан çынсене пурне те хутшăнма чĕнсе калать.
2015 çулхи апрелĕн 1-мĕшĕнчен тытăнса июнĕн 1-мĕшĕччен республикăра пурăнакан кирек кам та пирĕн пата çемье архивĕнчи вăрçă çулĕсемпе, хыççăнхи вăхăтпа, паянхи кунпа çыхăннă сăн ÿкерчĕксене, çар билечĕсене, награда докуменчĕсене, фронтран килнĕ çырусене, дневниксене тата ыттине илсе пыма пултарать. Адресĕ: Шупашкар хули, И. Яковлев проспекчĕ, 12 А çурт.
Вăхăт хăйĕннех тăвать. Пурăна киле аса илÿсем манăçаççĕ, сăн ÿкерчĕксемпе документсем сарăхаççĕ. Каярахпа вĕсем пачах та пĕтĕç. Çавăнпа та кашни çемьен хăйĕн хаклă коллекцине сыхласа хăвармалла тесе шухăшлатпăр. Час-часах тăванĕсем хăйсемшĕн реликви пулса тăракан документсене хăйсенчен уйăрасшăн мар. Анчах та архивăн специфики çавăн пек: документсем хăйсен хуçисенчех юлаççĕ. Вĕсем умĕнчех документсене цифра мелĕ çине куçарĕç те оригиналсене çемьесене тавăрса парĕç.
Архив коллективĕ вăрçă ветеранĕсемпе тыл ĕçченĕсене, вĕсен тăванĕсене кĕтет. Айтăр-ха пĕрле тăрăшса хăйсен аллипе пире Çĕнтерÿ парнеленисен астăвăмне ĕмĕр манăçми тăвар.
Интереслентерекен пур ыйтупа та çак номерсемпе шăнкăравлама пултаратăр: 51-03-93* 51-05-07* 52-35-15.
М. АЛЕКСАНДРОВА.