08 апреля 2015 г.
Шупашкар енчен Муркаша пырса кĕнĕ çĕрте Парковая урам катаранах илемлĕн курăнать. Унта 4 хутлă нумай хваттерлĕ çĕнĕ çуртсем вырнаçнă. Иртнĕ çулхи декабрь уйăхĕнче 40 хваттерлĕ 5 хутлă 2 подъездлă çурт хута кайрĕ. Ку çуртсене хуçалăхсем хушшинчи "Моргаушская" строительство организацийĕн строителĕсем çĕкленĕ. Хăйĕн 56 çулхи аталану тапхăрĕнче ку компани ача сачĕсем, чăх-чĕп фабрики, больницăсем, шкулсем, пурăнмалли çуртсем пĕрре кăна мар хута янă. Хальхи строительство объекчĕсене уйрăмах пысăк тимлĕх уйăраççĕ. Муркашра пурăнакансем валли çĕнĕ çурта малти технологи мелĕсене тĕпе хурса ĕçе кĕртеççĕ.
Хальхи вăхăтри çĕнĕ хваттерте пурăнма кам хирĕç пултăр; Район центрĕнчи кашни çынах хуларинчен нимĕнпе те кая мар харпăр хăйĕн хваттерĕнче пурăнасшăн. Хваттерсенчен пĕрне кĕрсе пăхсанах "Моргаушская" МСО пурнăçлакан ĕçсен пахалăхне хак пама пулать. Хваттерсене харпăр хăй хутса ăшăтмалла тунă, пластик чÿречесем айĕнче биометалтан тунă радиаторсем вырнаçтарнă, алăкĕсем тимĕртен. Хваттерсенчи пÿлĕмсем ирĕклĕ, çутă, чÿречерен пăхсан тавралăх илемĕ куç умне тухать.
Хĕрарăм кирек епле хваттере кĕрсен те тÿрех кухньăна васкать. Парковая урамра пĕр пÿлĕмлĕ хваттерсенче кухня лаптăкĕ - 15 тăваткал метр! Унта гарнитур валли те, пĕтĕм çемье апатланма пысăк сĕтел вырнаçтарма та вырăн çитет.
Хальхи технологисемпе усă курнăран хăйсен пахалăхĕпе тата хăтлăхĕпе элита шутне кĕрекен çак хваттерсене паян ялта пурăнакансем те туянма пултараççĕ. Çуртсен картишĕнче ача-пăча площадки вырнаçтараççĕ. Автомашина хуçисем валли стоянка йĕркеленĕ, кĕпе-йĕм типĕтме те вырăн уйăрнă.
"Моргаушская" МСО çынсене çăмăллатнă майсемпе хваттерсемпе тивĕçтермелли федераци тата республика программисене пурне те хутшăнать. Çĕршывра финанс тĕлĕшĕнчи лару-тăру кăткăссине пула пурте кун пек хваттере туянма май çитереймест. Çавăнпа та "Моргаушская" МСО хваттерне туянакансене кăна банксем ипотека кредитне çулталăкри 11,9 процент ставкипе тивĕçтереççĕ. Çынсем унпа хапăл тусах усă кураççĕ.
Н. ВАСИЛЬЕВ.