22 февраля 2013 г.
Сăвăм ÿсрĕ
Кун таврăннă май хуçалăхсенче ĕнесем пăруласси нумайланчĕ. Çак вăхăт – ял çыннишĕн кĕтнĕ самант. Йĕркеллĕ пăруланă ĕнесем сĕт ытларах антарма пуçлаççĕ. Ку эрне пуçланнă тĕле пĕрлешÿллĕ хуçалăхсенчен оперативлă пуçтарнă кăтартусем сĕт сăвасси ÿснине çирĕплетеççĕ. Çулталăк каялла район нарăс уйăхĕн 18-мĕшĕнче кашни ĕне пуçне вăтамран 10,9 килограмм сĕт сунă пулсан, кăçалхи кăтарту 11,2 килогрампа танлашать. Чи пысăк сăвăм унчченхиллех Суворов яч. хис. хуçалăхра (17,5 килограмм). Чи пĕчĕк кăтарту «Передовик» ял хуçалăх производство кооперативĕнче: 4,5 килограмм.
Çырла ÿстересшĕн
Кун вăрăмланса пынă май сисмĕпĕр те, алăкран çур аки шаккĕ. Мичурин ячĕпе хисепленекен агрофирма ертÿçи Б. Михайлов вара паянах çурхи ака-суха пирки калаçать. Ăна кăсăклантараканни – çырла йăранĕсем çинче ĕçлекенсем кирли. Асăннă агрофирма иртнĕ çул Голландирен илсе килсе пысăк шанчăк паракан çĕр çырлин хунавне пĕр гектар çинче лартса хăварнă. 4 сортлă çырлан хунавĕсемпе усă курса фермер кăçалхи çур акире çырла лаптăкĕн калăпăшне 3 гектара, çитес кĕркунне татах ÿстерес ĕмĕтлĕ. Ĕç планĕпе килĕшÿллĕн çырла лаптăкĕ çывăх çулсенче Шетмĕпуçĕнче 13 гектар пулмалла. «Çырла ыйтакансем йышлă пулнăран хамăрăн производство планне çак енпе йĕркелес шут çуралчĕ те», – терĕ ертÿçĕ кĕске калаçура.
Йĕркене пăснăшăн
Раççей Федерацийĕн Чăваш Республикипе ĕçлекен федераллă миграци службин управленийĕн Муркашри территори пункчĕ хăйĕн ĕç тĕллевĕсене туллин пурнăçласа пырать. Çак кунсенче кăна территори пункчĕн ертÿçи Л. Плечова регистраци йĕркине пăснă гражданина административлă майпа явап тыттарса таврăнчĕ. Ыттисене пĕлме, ку хутĕнче лару-тăру çапларах çаврăнса тухнă. Пĕр çын кунта пурăнма шутламан азербайджанеца пĕлсе тăрсах хăйĕн килĕнче вăхăтлăх регистрацилет. Саккуна пăсни çиеле тухсан çак ентешĕн административлă майпа явап тытма тиврĕ. Сăмах май, кунашкал йĕркесĕрлĕхшĕн саккун 5 пин тенкĕ таран штраф тÿлеттерме пултарать. Л. Плечова каланă тăрăх кун пек тĕслĕхсем районта иртнĕ çул пиллĕк пулнă.
А. БЕЛОВ хатĕрленĕ.