20 февраля 2013 г.
Вакансисем пур
Çулталăк пуçланнăранпа районти ĕçпе тивĕçтерекен центра 127 çын ĕç тупас ыйтупа пынă. Официаллă майпа ĕçсĕррисен шутĕнче çак эрне пуçламăшĕ тĕлне 18 çын пулни паллă. Çав вăхăтрах районта ĕçпе тивĕçтерекенсем пурĕ 137 ваканси пуррине çирĕплетсе панă.
2013 çул пуçланнăранпа ĕçпе тивĕçтерекен центр обществăлла ĕçе 12 çынна явăçтарнă, 14–18 çулхи 50 çамрăкпа вĕренÿрен пушă вăхăтра ĕçлеме килĕшÿсем тунă, ĕçсĕр пĕр çынна вăхăтлăх ĕç тупса панă. Центр пулăшнипе Раççейри ытти регионсене 6 çын ĕçлеме кайнă, професси илме вĕренÿ курсĕсене 7 çын çÿрет.
Музей йыхравлать
Варнава митрополит Шупашкар – Чăваш епархине вăтăр çул ытла ертсе пырать. Унăн пурнăçĕ, ĕçĕ-хĕлĕ питĕ анлă та курăмлă. Çак кунсенче Муркашри Тури чăвашсен музейĕнче Варнава митрополитăн 80 çулхи юбилейне халалласа унăн кун-çулĕпе паллаштаракан курав ĕçлет. Курава Чăваш наци музейĕнчен илсе килнĕ. Муркаш шкулĕнчи кадетсем, вырсарни шкулĕнче вĕренекенсем унпа паллашма ĕлкĕрнĕ те ĕнтĕ. Музей кашнинех хапăл туса кĕтет.
Мăн Сĕнтĕрсем – сывлăхшăн
Виççĕрен пуçласа вăтăр çул тултарнă çамрăксем, аслăраххисем те вырсарни кун Мăн Сĕнтĕрте пĕрле пухăннă. Çамрăксен канашĕпе пĕрле ял тăрăхĕн администрацийĕ кунта сывлăх кунне ирттернĕ. Сăрт çинчен ярăнассине, йĕлтĕрпе ăмăртассине йĕркеленĕ, пейнтболла вылянă, «ту патшине» те палăртнă. Çак пысăк мероприятие ирттерме спонсорсем те пулăшнă.
Ял пухăвĕнче
Иртнĕ кунсенче Юнкă салинче пурăнакансем малаллахи ĕç-хĕле пĕрле пухăнса палăртнă. Ялти урамсене тирпей-илем кĕртесси, пушар хăрушсăрлăхĕ, харпăр хăйĕн хăрушсăрлăхĕ – темĕн те пăшăрхантарать ял çыннине. Ялтан полигона каяш турттарса тухма вара Юнкăна кашни уйăхăн пĕрремĕш эрне кунĕнче ятарлă машина пырать. Çавăнпа та каяша тирпейлĕн михĕсене пухса урамсенчи урнăсене палăртнă вăхăта илсе тухма калаçса татăлнă. Апрелĕн 22-мĕшĕччен кашни урамрах субботник ирттерме те палăртса хунă.
Çĕнĕ ăмăрту пуçарса ячĕç
Иртнĕ шăмат кун пирĕн районти спорт ăмăртăвĕсен «пуххи» татах та пуянланчĕ. Шкул ачисене массăллă спорта ытларах явăçтарас тата вĕсене сывă пурнăç йĕрки тытса пыма хистес тĕллевпе Шупашкарти «Спрут-Сервис» пĕрлешÿ Чуманкассинчи вăтам шкулта районти шкул ачисен командисем хушшинче волейбол ăмăртăвне ирттернĕ. Турнира çак ял тăрăхĕнче пурăнакансен командисем те хутшăннă. (Тĕплĕнрех çитес номерте).
Район администрацийĕпе асăннă пĕрлешÿ килĕшсе çирĕплетнĕ тăрăх ăмăртăва кашни çул ирттерме палăртнă.
Н. Николаева хатĕрленĕ.