11 марта 2015 г.
Пĕтĕм Раççейри "Золотая шайба" турнирăн республика тапхăрĕнче çĕнтерÿçĕ пулма тивĕçнĕ Муркаш районĕн çамрăк хоккеисчĕсем паян республика чысне хÿтĕлеме Пушкăртри Салават хулине тухса кайрĕç. Хоккеистсен тумĕ, шайби-клюшки тата ытти хатĕрĕсем ахаль те йÿнĕ мар. Çавăнпах вĕсене Раççей турнирĕн финалне илсе тухассине ачасемпе çамрăксен районти спорт шкулĕ - "Сывлăх" ФСК пĕтĕмпех хăй çине илнĕ. Кун пирки унăн директорĕпе Александр Куликовпа тĕл пулса калаçнинчен пĕлме тÿр килчĕ.
- Çамрăк хоккеистсем тĕрлĕ шайри ăмăртусене хутшăнма пултарччăр тесе эпир яланах спонсорсемпе ĕçленĕ, хальхинче хамăр вăй çитертĕмĕр. Малтанхи çулсене илес пулсан та пирĕн спорт шкулĕн воспитанникĕсем асăннă турнира выляма тухса çÿрерĕç. Районта çитĕнекен ăрăва пулăшас тĕллевлĕ предприятисем, ертÿçĕсем пулнăран, вĕсем пирĕн çивĕч ыйтусене ăнланнăран ачасене эпир "чару çук, тăрăшăр кăна" тесе калама пултаратпăр, - тет Александр Николаевич.
Пирĕн районта спорта пысăк тимлĕх уйăрни, уйрăмах массăллă спорта аталантарма тăрăшни - яланах куç умĕнче. Район администрацийĕн пуçлăхĕн Р. Тимофеевăн тăрăшулăхне, çавна май районти спорт шкулĕсен тăрăшулăхне тăтăш спорт мероприятийĕсене хутшăнакансем кăна мар, нумаях пулмасть ирттернĕ калаçура Чăваш Ен спорт министрĕ С. Мельников та палăртса хăварчĕ. Чăнах та, ачасемпе çамрăксем кăна мар, 80-ран иртнĕ хисеплĕ ватăсем те ăмăртусене тухаççĕ пулсан, ку, паллах, меллĕ условисем пуррине çирĕплетсе парать.
Анчах хоккей патнех таврăнар-ха. Кăçалхи сезонта ачасемпе çамрăксен спорт шкулĕ - "Сывлăх" ФСК хоккей уйрăмĕн кĕçĕн ушкăнĕ те республика шайĕнче лайăхпа палăрчĕ. "Золотая шайба" турнирăн республика финалĕнче Муркаш, Юнкă тата Сыпай уйрăмĕсенчи воспитанниксем мала тухрĕç.
- Вăтам ушкăнри хоккеистсем республикăра 4-мĕш вырăна тухнăран, малалла "Надежда" ("Шанчăк") турнирта хăйсене тĕрĕслеме пултарчĕç. Унта 2-мĕш пулчĕç, - каласа парать Александр Николаевич.
Çамрăк хоккеистсемпе ĕçлекен В. Михайлов тата А. Шишкин тренерсен ĕçне пысăка хурса хаклать спорт шкулĕн директорĕ. "Золотая шайба" турнирăн республика çĕнтерÿçисене хатĕрленĕшĕн вĕсене ăмăртура 10-шар пин тенкĕлĕх сертификат панине питĕ вырăнлă тесе шутлать. Хоккейла выляма тĕрлĕ хатĕр туянма вара ачасем хăйсен вăййипе 100 пин тенкĕлĕх сертификата тивĕçни - хăйсемшĕн самай пысăк çитĕнÿ, савăнăç тата хавхалантару.
- Хавхалантару кирек кама та пулăшать, - тет А. Куликов. Темиçе çул каялла вара хоккеистсемпе ĕçлеме тренерсене майсем туса парассипе тимлетчĕ-ха вăл. Ачасен выляс кăмăл пысăк, çавăнпа та пирĕн шкула тренерсем кирлех, тесе калани те асрах.
Районти хоккей площадкисенче хĕлĕпех тĕрлĕ ăмăрту иртет, тренировкăсем - тăтăшах. Унсăрăн ÿсĕмсем патне çитме çук. "Сывлăх" çумĕнчи пăр курупки çинче хĕлĕпе акă тăватă турнир иртрĕ. Вĕсене йĕркелесе ирттерме пулăшаканĕсем - районти хоккей федерацийĕпе район администрацийĕ. Юнкăри пăр çинче те кашни канмалли кун тенĕ пекех тĕрлĕ турнир йĕркелерĕç. Кунта ял тăрăхĕн пулăшăвне ырламалла. Сыпайри пăр çине ярăнма тухакан та сахал мар, ăмăртусем те иртеççĕ кунта.
Ачасем кăна мар, пирĕн районта аслисем те хоккей вăййине кăмăллаççĕ. Акă иккĕмĕш çул Муркаш ял тăрăхĕн арçынсен хоккей команди Красноармейски салине хоккей турнирне хутшăнать. Ял тăрăхĕн пуçлăхĕ С. Ермолаев каланă тăрăх вĕсем кăçал та февралĕн 28-мĕшĕнче пĕлтĕрхи пекех кÿршĕре иртнĕ турнирта 2-мĕш вырăн çĕнсе илнĕ. Турнир вара Красноармейски ял тăрăхĕн пуçлăхĕн кубокне çĕнсе илессишĕн иртет-мĕн.
Кÿрше тухса хамăра кăтартма май туса пани тав сăмахне тивĕç, вырăнта турнирсем йĕркелени те аван. Калмăкри пуçаруллă çынсем пурри те районта хоккей аталанăвĕ çине лайăх витĕм кÿрет. Унти хоккей пăрĕ те çынсăр тунсăхламасть: кунта е черетлĕ ăмăрту иртет, е вырăнта пурăнакансем кăмăла хăпартма тухса ярăнаççĕ. Калмăкри пăра пурнăç панинче Воронинсен (шăллĕпе пиччĕшĕ) пуçарăвĕ тата Москакасси ял тăрăх администрацийĕн пулăшăвĕ курăмлине палăртать А. Куликов. Çапла вара районта спортри пуçарулăхпа ăнланулăх пурри малашне те ÿсĕмсем пуласса шантарать.
Н. Димитриева.