04 марта 2015 г.
Районăн 2014 çулхи экономикăпа социаллă пурнăç аталанăвне иртнĕ шăматкун Кашмашри Культура çуртĕнче пĕтĕмлетрĕç. Çак мероприятие район йĕркеленнĕренпе 71 çул çитнине халалланă уяв шайĕнче ирттерчĕç. Кунта депутатсен районти Пухăвĕн депутачĕсем, предприятисемпе организацисен, учрежденисен ертÿçисем, ял тăрăхĕсен пуçлăхĕсем, район активĕ пуçтарăнчĕ.
Муркашсен ĕçĕ-хĕлĕн пĕтĕмлетĕвĕпе паллашма Чăваш Республикин Министрсен Кабинечĕн Председателĕ Иван Моторин та килсе çитрĕ.
Мероприяти савăнăçлă самантпа - ĕçре хастарлăхпа палăрнă, тÿрĕ кăмăлпа вăй хунă ĕçченсене патшалăх наградисем панинчен пуçланчĕ. (Вĕсемпе çитес номерте уйрăммăн паллаштаратпăр. - Авт.) Çак чыса тĕрлĕ отрасльте тăрăшакан ĕçченсем тивĕçрĕç. Чăваш Республикин Пуçлăхĕн стипендине, виççĕмĕш ача çуратнăшăн республикăн амăш (çемье) капиталне тата тÿлевсĕр çĕр лаптăкне, "Чăваш Республикин Ĕç ветеранĕ" ята тивĕçнисене те сцена çинче чысларĕç.
Районăн 2014 çулхи экономикăпа социаллă пурнăç аталанăвĕн тишкерÿллĕ доклачĕпе район администрацийĕн пуçлăхĕ Ростислав Тимофеев тухса калаçрĕ. Вăл кашни сферăри лару-тăрупа тĕплĕн паллаштарчĕ, çитĕнÿсем пирки асăннă май 2015 çула палăртнă задачăсем çинче те чарăнса тăчĕ.
Сăн ÿкерчĕкре сулахайран сылтăмалла: район администрацийĕн пуçлăхне Р. Тимофеева, Чăваш Республикин Министрсен Кабинечĕн Председательне И. Моторина тата район пуçлăхне И. Николаева "Моргауши-Хлеб" пĕрлешĕвĕн генеральнăй директор çумĕ Е. Васильева пĕрлешÿ продукцийĕпе паллаштарать.
Р. Тимофеев доклада промышленноçри лару-тăрупа паллаштарнинчен пуçларĕ. 2014 çулта районта пурĕ 2 млрд. та 600 миллион ытла тенкĕлĕх продукци туса кăларнă. Ку тĕлĕшпе "Сеспель", "ТрубПласт" пĕрлешÿсем, Муркашри кирпĕч завочĕ çулталăка уйрăмах лайăх кăтартусемпе вĕçленĕ.
Ял хуçалăх продукцине туса илесси те ÿснĕ. Пĕлтĕр районти пур категори хуçалăхĕнче пĕтĕмпе 2 млрд. та 200 миллон ытла тенкĕлĕх продукци туса илнĕ. Ку вăл малтанхи çулхинчен 18 процент ытларах. Çапла вара хальхи хаксемпе районти пĕр çын пуçне шутлас пулсан - кашни валли 67 пин тенкĕлĕх продукци. Республикăри вăтам кăтартуран районти кăтарту самаях пысăк.
Докладра Р. Тимофеев района аталантарас тĕллевпе явăçтаракан инвестици калăпăшĕ те малтанхи çулхинчен ÿснине палăртрĕ. Хальхи вăхăтра районта 21 инвестици проекчĕ пурнăçланать. Инвестици активлăхĕн рейтингĕнче Муркашсем республикăра иккĕмĕш вырăн йышăнаççĕ.
Районта çурт-йĕр хута ярас, çул-йĕр тăвас тата юсассинче те пысăк ĕçсем туса ирттернĕ. Ку отрасльсенче кăçал та пысăк калăпăшлă ĕçсем тума палăртса хăварнă, вăл шутра - ялсенче куçăмлă сийлĕ çулсем тăвассине те.
Пурлăх тата çĕр хутшăнăвĕ, социаллă хÿтлĕх, вĕренÿ, спорт, культура сферисем, сывлăха сыхласси, район аталанăвне пырса тивекен ытти пур сферăра та ÿсĕмлĕ вăй хуни палăрать. Çакă вара районта пурăнакан кашни çын тăрăшнипе пулнине палăртса Ростислав Николаевич пурне те тав сăмахĕ каларĕ. "Районта пурăнакансем тăван ене юратса вăй хунипе, Чăваш Ен Пуçлăхĕ М. Игнатьев, Чăваш Ен Правительстви пулăшса пынипе, районти депутатсем, предприяти-организацисен ертÿçисем, ял тăрăхĕсен пуçлăхĕсем - пурте пĕр-пĕрне ăнланса вăй хунипе пулнă çак ÿсĕмсем. Пурне те тав сăмахĕ калатăп. Пĕрле эпир район аталанăвĕшĕн чылай ĕç туса ирттертĕмĕр, Муркаш районĕнче пурăнакансем хăйсене хăтлă туйччăр тесен вара пĕрле пурнăçламалли пирĕн татах та нумай", - тесе вăл 2015 çула палăртнă задачăсене асăнчĕ.
ЧР экономика аталанăвĕн, промышленноç тата суту-илÿ министрĕн пĕрремĕш çумĕ И. Антонова Муркаш районĕ ытти районсемпе танлаштарсан япăх мар позици йышăннине пĕлтерчĕ. Хăй сăмахне тишкерÿсен пĕтĕмлетĕвĕпе çирĕплетсе пачĕ. Акă промышленноç предприятийĕсем продукци туса кăларнипе Муркашсем республикăри районсенчен 3-мĕш вырăнта, района инвестици явăçтарнипе - 2-мĕш вырăнта, çурт-йĕр хута ярассипе - 3-мĕш вырăнта... Малашне аталанса пырассипе те министр çумĕ вырăнлă сĕнÿсем пачĕ.
Çавăн пекех Муркашсем умĕнче ЧР финанс министрĕн çумĕ С. Иванова тата ЧР ял хуçалăх министрĕн çумĕ П. Якимов та тухса калаçрĕç.
Пĕтĕмлетÿ ĕçне тишкерсе Министрсен Кабинечĕн Председателĕ Иван Моторин кăçалхи задачăсем çинче ытларах чарăнса тăчĕ. Вăл шутра Аслă Çĕнтерÿ тунăранпа 70 çул çитни уйрăмах вăрçă ветеранĕсемшĕн çулталăкри чи пĕлтерĕшлĕ уяв пулса тăмаллине те палăртрĕ. "Малалла та ÿсĕмлĕ аталанса пырас тесен ытларах хамăр вăй çине шанмалла, пĕрле пулса тимлĕ те активлă ĕçлемелле. Пуçланă проектсене вĕçне çитермелле", - терĕ вăл.
Мероприятин иккĕмĕш пайне район пуçлăхĕ - депутатсен районти Пухăвĕн председателĕ Игорь Николаев уçрĕ. Вăл пурне те района йĕркеленĕренпе 71 çул çитнĕ ятпа саламларĕ. Ырă йăлапа вара районти экономика ăмăртăвĕнче мала тухнисене чысларĕç (Вĕсемпе уйрăммăн çитес номерте паллаштаратпăр. - Авт.), художество пултарулăх коллективĕсем ташă-юрăпа савăнтарчĕç.
Н. Николаева.
Сăн ÿкерчĕкре: уявра Çатракасси ял тăрăхĕнчи виçĕреш ачасем çуратнă Охотниковсен çемйине те чысларĕç.
Фоторепортажпа хаçат сайтĕнче паллашăр.