07 марта 2015 г.
Муркаш ен спортпа туслă пулни кашни ăрушăнах ĕненÿллĕ вырăнта. Çакна пуш уйăхĕн 1-мĕшĕнче Калайкассинчи вăтам шкулта Юрий Федотов ячĕпе ирттернĕ ăмăрту та çирĕплетсе пачĕ.
Кам-ха вăл Юрий Иванович; Паян йĕлтĕр йĕрĕ çине тăракан çамрăк ăрăва пĕлме. Сыпайĕнчи пĕтĕмĕшле пĕлÿ паракан шкулта 8 класс пĕтернĕ яш спортпа туслă пулнине асăрханипе тренерсем ăна Муркашри спорт шкулне пĕлÿ пухма чĕнсе илеççĕ. Унта пĕр çул вĕреннĕ хыççăн вăл малаллахи пĕлĕве Калайкассинчи вăтам шкулта тăсать. Шкулти вĕренĕве Мухтав грамотипе вĕçленĕскер Чăваш патшалăх университечĕн строительство факультетне вĕренме кĕрет. Спортпа ачаран туслă пулнăскер çак çула вăл малалла кунта туптать. Çапла вара вăл Чăваш Республикинчи хĕллехи спорт тĕсĕсен нумай енлĕ ăмăртăвĕн (йĕлтĕрпе чупасси, турник çинче туртăнасси, пăшалтан тĕл пересси) чемпионĕ пулса тăрать. Малашлăх пысăкчĕ, анчах...
Пурнăçĕ вăхăтсăр татăлнăскерне хисеплесе унăн пиччĕшĕсемпе аппăшĕсем кăçал 13-мĕш хут Калайкассинчи вăтам шкулта Ю. Федотов ячĕпе йĕлтĕр эстафетин ăмăртăвне ирттерчĕç. Эстафетăна 41 команда хутшăнни çак ăмăрту иртнĕ çулсенче хăйĕн пĕлтерĕшне районтан республика шайне кăларнине çирĕплетет. Каламалла, ку эстафета - учительсемпе вĕренекенсем уйрăм командăсемпе пĕрле вăй виçекен ăмăрту.
- Паянхи эстафета эпир хамăрăн аслă юлташăмăрсене манманнине, сывă пурнăç йĕркине мала хунине кăтартать. Паянхи çамрăксем те пурăна-киле Ю. Федотов пекех паллă спортсменсем пуласси пирки иккĕленÿ çук. Халĕ каланине кунта вĕреннĕ В. Акимов биатлонист нумаях пулмасть çамрăксем хушшинче Европа чемпионĕ тата аслисемпе ăмăртса кĕмĕл призер пулни те ĕнентерет, - терĕç ăмăртăва уçса ЧР физкультурăпа спорт министрĕн çумĕпе С. Шелтуковпа район администрацийĕн пуçлăхĕ Р. Тимофеев.
Эстафета туслă та çивĕч иртрĕ. Спортпа туслă Федотовсен ячĕ кашни дистанцирех хăйĕн йĕрне хăварчĕ. Çапла вара аслисен ушкăнĕнче Калайкассисене çитекенни пулмарĕ. Вăталăххисен ушкăнĕнче Элĕк районĕн, Çатракассинчи тата Муркашри вăтам шкулсен командисем палăрчĕç.
Пĕтĕмĕшле пĕлÿ паракан тĕп шкулсен командисем те хастарлăхпа палăрчĕç. Шетмĕпуçсемпе Сыпайсем тата Атапайсем вăр-вартарах пулни палăрчĕ.
Учительсен спортпа туслă коллективĕсем хушшинче Шетмĕпуçсем хастартарах пулчĕç. Хыççăнхи вырăнсенче - Муркашсемпе Туçи çармăссем.
Ăмăртури пĕр паллă саманта уйрăммăн палăртса хăварас килет. Спорт аталанăвне пысăк тÿпе хывнăшăн Ю. Федотовăн пиччĕшне Михаил Ивановича ЧР физкультурăпа спорт министрĕн çумĕ С. Шелтуков РФ Президенчĕ В. Путин алă пусса çирĕплетнĕ грамотăпа "2014 çулта Сочире иртнĕ хĕллехи 22-мĕш Олимп вăййисем тата хĕллехи 11-мĕш Паралимпиада вăййисем" асăну медалĕпе наградăларĕ.
А. БЕЛОВ.