21 февраля 2015 г.
Иртнĕ юнкун пирĕн районта, пĕтĕм республикăри пекех, пĕрлехи информаци кунĕ иртрĕ. Ăна ирттерме района ЧР гражданла оборона тата чрезвычайлă лару-тăру патшалăх комитечĕн председателĕ Вениамин Петров ертсе пыракан ушкăн килчĕ. Вĕсене район администрацийĕн пуçлăхĕ Ростислав Тимофеев йышăнчĕ. Информаци кунĕнче ЧР Пуçлăхĕн М. Игнатьевăн Чăваш Республикин Патшалăх Канашне янă 2015 çулхи Çырăвне, РФ Президенчĕн В. Путинăн "Раççей Федерацийĕнче Литература çулталăкне ирттересси çинчен" Указне, пенси системинчи улшăнусене тишкерчĕç.
В. Петровпа Р. Тимофеев информаци кунне ирттерме "Путь Ильича" агрофирмăна çитрĕç. Кунта районти ял хуçалăх предприятийĕсен ертÿçисем пуçтарăннăччĕ. Вĕсем концентрациллĕ выльăх апачĕ хатĕрлес ыйтăва сÿтсе яваççĕ.
Ку хуçалăхра паян сăвакан ĕне 378 пуç, пĕтĕмпе 800 пуç усраççĕ. Малта пыракан хуçалăх çĕнĕлĕхсене вăя кĕртессипе те ыттисемшĕн тĕслĕх пулса тăрать. Кунта ĕнесене ятарласа хатĕрлекен концентрациллĕ апатпа тăрантараççĕ. Вăл 10 тĕрлĕ хутăшран тăрать.
Хуçалăхăн ĕç тăвакан директорĕ Алексей Воробьев каланă тăрăх, выльăхсене çĕнĕлле тăрантарни тÿрех сăвăма ÿстерме май панă.
Унтан информаци ушкăнĕ Ильинка тăрăхне çул тытрĕ. Кунта В. Петровпа Р. Тимофеев Тренккăри почта уйрăмĕн ĕçченĕсемпе, Ильинка ял тăрăхĕн активĕпе тата Ильинка шкулĕн педагогĕсемпе тĕл пулчĕç.
В. Петров Республика Пуçлăхĕн Çырăвĕ çинче тĕплĕн чарăнса тăчĕ. Вăл юлашки çулсенче промышленноçри, строительствăри, ял хуçалăхĕнчи кăтартусем ÿссе пынине палăртрĕ. Юлашки 3-4 çул хушшинче республикăра пĕр пысăк предприяти те хупăнман.
"Раççей чукун çулĕсем" акционерла общество ертÿçи Владимир Якунин республикăра пулнă чухне пирĕн предприятисемпе малашне те ĕçлеме хатĕррине çирĕплетрĕ. Районти "Çеçпĕл" предприяти те заказсем илес шанчăк пур.
Раççей Правительствин Пуçлăхĕ Дмитрий Медведев пирĕн республикăра РФ Президенчĕ çумĕнчи Раççей экономикине модернизацилес тата инноваци аталанăвĕ енĕпе ĕçлекен канашĕн президиумĕн ларăвне ирттерни ăнсăртран мар. Дмитрий Медведев Михаил Игнатьевпа тĕл пулнă чухне республикăра çурт-йĕр тăвассипе лайăх ĕçленине палăртрĕ.
Паллах, татса памалли ыйтусем те çук мар. Акă республикăра çĕр улми туса илессине ÿстермелле. Сĕт хакĕ пĕчĕкки те ял çыннисене пăшăрхантарать. Сĕт хакне тĕрĕс палăртмалли йĕркене кăçалхи июлĕн 1-мĕшĕччен хатĕрлемеллине Çырура палăртнă.
Раççей вĕрентÿ министрĕ Дмитрий Ливанов пирĕн республика бюджечĕн виççĕмĕш пайне вĕренÿ ĕçне валли уйăрнине палăртрĕ. Юлашки çулсенче 28 ача сачĕ хута янă. Виçĕ çултан аслăрах ачасене пурне те садиксенче вырăнсемпе тивĕçтернĕ.
Сăмах Литература çулталăкĕ пирки те пулчĕ. Аслă ăру çыннисемшĕн кĕнеке юлташпа, канаш параканпа пĕрех пулнă. Паянхи çамрăксене те çакна ăнланма пулăшмалла.
Район администрацийĕн пуçлăхĕ Р. Тимофеев ытларах пенси системинчи улшăнусем çинче чарăнса тăчĕ. Район экономикипе социаллă пурнăç аталанăвне тишкерчĕ. Инвестици проекчĕсем пирки те каларĕ. "Путь Ильича" хуçалăхра хальхи ĕне ферми хута янă. Мăн Сĕнтĕрте пăрăхсем кăларакан "Трубпласт" предприяти ăнăçлă ĕçлет. Юнкă ял тăрăхĕнче кăмпа çитĕнтерме тытăннă. Çуллен ăна 60 миллион тенкĕлĕх реализацилеме палăртаççĕ. Акă Ильинка тăрăхĕнче туризма аталантараççĕ, район федераци программине кĕнĕ ĕнтĕ. "Çеçпĕл" предприяти тата тепĕр завод хута яма палăртать. Кунта тата 300 - 400 ĕç вырăнĕ пулать.
Ял çыннисем "Ĕç ветеранĕ" ята тивĕçес, çулсем тăвас тата вĕсене пăхса тăрас, урамсене çутатас, шывпа тивĕçтерес, культурăна аталантарас ыйтусене хускатрĕç.
Ял çынни йывăрлăхсенчен хăрамасть. Ĕçлесен çеç лайăх пурăнма май пуррине пĕлет вăл. Вăл умри йывăрлăхсене çĕнтеретех. Курăмлă ÿсĕмсем пурри те çапла шухăшлама май парать.
А. Тихонов.